२९ फाल्गुन २०७५, काठमाडौं
विश्व फुटबलका कुशल खेलाडी क्रिस्टियानो रोनाल्डोको ह्याट्रिकसंगै युभेन्टसले एट्लेटिको म्याड्रिडलाई अन्तिम १६ को दोस्रो लेगमा ३–० ले पराजित गर्दै समग्रमा ३–२ को जित हात पारेको छ ।
खेलको २७ औं मिनेटमा उत्कृष्ट हेडिङ गोल गर्दै रोनाल्डोले घरेलु मैदानमा आफ्नो टोलीलाई अग्रता दिलाए । त्यस्तै खेलको ४८ औं मिनेटमा पुनस् हेडिङ गोल गर्दै रोनाल्डोले टोलीको अग्रता दोब्बर बनाउंदै समग्रमा २–२ को नतिजासम्म पुर्याए ।
खेलको ८५ औं मिनेटमा फेडेरिको बर्नाडेस्कीमाथि डिबक्समा फाउल हुँदा युभेन्टसले पेनाल्टी पाएको थियो ।
सो पेनाल्टीमा रोनाल्डोले गोलकिपर जान ओब्लाकलाई विपरित दिशातर्फ पठाउंदै आफ्नो ह्याट्रिक तथा टोलीको उत्कृष्ट पुनरागमन सुनिश्चित गरेका हुन् ।
यस नतिजासंगै युभेन्टस च्याम्पियन्स लिगको क्वाटरफाइनलमा पुग्न सफल भएको छ भने एट्लेटिको म्याड्रिड प्रतियोगिताबाट बाहिरिएको छ ।
