आईपिएल आजदेखि सुरु हुँदै, उद्घाटन खेलमा चेन्नई सुपर र रोयल च्यालेन्जर्सबीचको प्रतिस्पर्धा हुने !

०९ चैत्र २०७५, काठमाडौं

इन्डियन प्रिमियर लिग (आईपिएल) को १२ औं संस्करण आजदेखि भारतमा सुरु हुँदैछ ।

भारतको विभिन्न शहरमा खेलिने आईपीएलको उद्घाटन चेन्नईमा शनिबार साँझ ८ः१५ बजे हुनेछ । उद्घाटन खेलमा साविक विजेता चेन्नई सुपर किंग्स र रोयल च्यालेन्जर्स बैंगलोरबीचको प्रतिस्पर्धा हुँदैछ ।

चेन्नईको कप्तानमा भारतका पूर्वकप्तान महेन्द्रसिंह धोनी छन् । बैंगलोरको कप्तानमा भारतीय कप्तान विराट कोहली रहेका छन् । स्टार खेलाडीले भरिएको दुवै टोली जित निकाल्न लालायित देखिएका छन् ।

आईपीएलमा आठ टोलीबीच डबल राउण्ड रोबिन लिगका आधारमा प्रतिस्पर्धा गर्नेछन् । लिगको शीर्ष चार टोलीले प्ले अफ खेल्नेछन् । नेपालका लेग स्पिनर सन्दीप लामिछाने सम्मिलित दिल्ली क्यापिटल्सले आइतबार मुम्बई इन्डियन्ससँग पहिलो खेल खेल्नेछ ।