२० चैत्र २०७५, काठमाडौं
ईटालिएन सिरी ‘ए’ अन्तर्गत लिगको शीर्ष स्थानमा रहेको युभेन्ट्सले सहज जित निकालेको छ ।
गएराती आफ्ना प्रमुख खेलाडी क्रिस्टियानो रोनाल्डो बिना नै मैदानमा उत्रिएको युभेन्ट्सले काग्लीयरीमाथि २–० गोलको जित हात निकालेको हो ।
युभेन्ट्सलाई सहज जित दिलाउन लियोनार्डो बोनुचि र मोइस केनले गोल गरे । युभेन्ट्सले २२ औं मिनेटमा बोनुचीको गोलमा अग्रता लिएको थियो । त्यसपछि ८५ औं मिनेटमा केनले गोल गर्दै युभेन्ट्सको जित सहज बनाएका थिए ।
फरवार्ड क्रिस्टियानो रोनाल्डो चोटका कारण अहिले विश्राममा रहेका छन् ।
उपाधि नजिक रहेको युभेन्ट्सले जितसँगै ३० खेलबाट ८१ अंक बनाएको छ । दोस्रो स्थानमा रहेको नापोलीको ६३ अंक छ । तेस्रो स्थानमा रहेको इन्टर मिलानको ५३ अंक छ ।
