१६ बैशाख २०७६, काठमाडौं
प्रधानमन्त्री केपी शर्मा ओलीका परराष्ट्र मामिला सल्लाहकार तथा विकासवादी नेता डा. राजन भट्टराईको पहलमा चावहिल क्षेत्रको ट्राफिक जाम कम गर्न काठमाडौं महानगरपालिका वडा नं. ७ र ४ अन्तर्गत धोबीखोला करिडोरमा पक्की पुल बन्ने भएको छ ।
गोपीकृष्ण–चावहिलको जाम कम गर्न विकासवादी डा. भट्टराईको पहलमा निर्माणाधिन पक्की पुलको भिडियो :
विकासवादी नेता डा. भट्टराईको पहलमा प्रदेश सरकारबाट विनियोजित भ्याट बाहेकको एक करोड १८ लाख बजेटबाट एक वर्ष भित्र सम्पन्न गर्ने गरी रायमाझी कन्स्ट्रक्सन प्रालिले ठेक्का पाएको हो । १७.८० मिटर लम्बाईको पक्की पुल ८.४० मिटर चौडाईको हुनेछ । जसमा ६ मिटर यातायात आवतजावतको लागि प्रयोग हुनेछ भने दुवै किरानारमा १.२० मिटर पैदल यात्रीको लागि छुट्याईने स्थानीय सडक पुल कार्यक्रमका इन्जिनियर लोक बहादुर खड्काले बताए ।
योजनाको प्रगति र गुणस्तर बारे बुझ्न डा. भट्टराई आज विहान वडा नं. ७ का जनप्रतिनिधि कृष्णमणि भट्टराई, स्थानीय समाजसेवी टिका पराजुली, स्थानीय टोल सुधार समितिका प्रतिनिधि सहित स्थलगत अनुगमनमा पुगेका थिए ।
रायमाझी कन्स्ट्रक्सन प्रालिले एक वर्षमा सम्पन्न गर्ने सम्झौता गरेको भएपनि चौबिसै घण्टा काम गरी निर्माण कार्यलाई करिव चार महिनामा सम्पन्न गर्ने लक्ष्य लिएको छ ।
यसअघि सोही ठेकेदार कम्पनीले मेलम्ची सिपाघाट पुल १८ महिनामा सक्ने गरी ठेक्का लिएकोमा ९ महिनामै कार्य सम्पन्न गरको थियो ।
विकासवादी डा. राजन भट्टराईकै पहलमा विनियोजित बजेटबाट निर्माणाधिन पुलको गुणस्तरमा विशेष ध्यान दिन निर्देशन दिदा आफूले दैनिक रुपमा अनुगमन गरिरहेको र गुणस्तरमा कुनै कमी आउन नदिने ईन्जिनियर खड्काले प्रतिवद्धता जनाए ।
मौसमले साथ दिए र अहिलेकै गतिमा काम हुन सके असारसम्ममा निर्माण सम्पन्न गर्ने ठेकेदार प्रतिनिधिले बताए ।
