क्यानको विवाद टुङ्ग्याउँन आईसीसीसँग कुरा गर्न पारसको आग्रह

१९ बैशाख २०७६, काठमाडौं

नेपाली क्रिकेट टोलीका कप्तान पारस खड्काले नेपाल क्रिकेट संघ(क्यान)को विवाद टुङ्ग्याउँन अन्तराष्ट्रिय क्रिकेट परिषद् (आईसीसी)सँग छलफल गर्न सरकारलाई आग्रह गरेका छन् ।

युवा तथा खेलकुद मन्त्रालयले बिहीबार आयोजना गरेको खेलाडी सम्मान कार्यक्रममा कप्तान पारसले यस्तो आग्रह गरेका हुन् ।

“मन्त्रीज्यूले आईसीसीसँग कुरा गरेर फुकुवा गर्नुपर्यो । हामीले धेरै कुरा गुमाईसकेका छौं ।” पारसले भने । “हाम्रो एकदिवसीय मान्यतालाई टिकाई राख्न क्यान आउनुपर्छ । हामीले अझ धेरै माथि पुग्नुछ ।”

लामो समयदेखि क्यान निलम्बनमा हुँदा नेपाली क्रिकेटले थप उचाई लिन नसकेको गुनासो गर्दै उनले आईसीसीसँग कुरा गर्न सरकारलाई आग्रह गरेका हुन् ।