३० बैशाख २०७६, काठमाडौं
नेपाल ओलम्पिक कमिटीले नेपाल सरकारबाट मुस्लिम आयोगको अध्यक्षमा मनोनित समिम मियाँ अन्सारी र खेलकुद पत्रकार मञ्चको नवनिर्वाचित कमिटीलाई ओलम्पिक हलमा विशेष कार्यक्रम आयोजना गरी सम्मान गरेको छ।
सम्मानीत अन्सारी नेपाल ओलम्पिक कमिटीको वर्तमान कार्यसमिति सदस्य समेत हुन भने मुश्लिम अधिकारको क्षेत्रमा लामो समयदेखि कार्यरत अभियन्ता समेत हुन्। सम्मान कार्यक्रमको मन्तव्यमा अध्यक्ष अन्सारीले कमिटीले गरेको सम्मानले आफूलाई थप उर्जा मिलेको बताउँदै आफू जुन जिम्मेवारीमा रहेपनि खेलकुद क्षेत्रको विकासमा निरन्तर लागिरहने प्रतिवद्धता समेत व्यक्त गरे।
नेपाल ओलम्पिक कमिटीका अध्यक्ष तथा प्रतिनिधि सभा सदस्य जीवनराम श्रेष्ठले दु:खमा मात्र होईन सुखमा समेत खुशी बाँड्नुपर्छ भन्ने उद्देश्यले कार्यक्रम आयोजना गरेको बताउँदै १३ दक्षिण एशियाली खेलकुद प्रतियोगिताको आयोजना र सफलताको लागि नेपाल सरकार र आफूले पुरा ध्यान दिने बताए।
खेलकुद पत्रकारहरुको छाता संगठन नेपाल खेलकुद पत्रकार मन्चका अध्यक्ष दुर्गानाथ सुवेदी (देवेन्द्र)ले मन्तब्य राख्दै भने नेपाल ओलम्पिक कमिटीले गरेको सम्मानले आफूलाई अझ क्रियाशील भै रहन प्रेरणा दिएको बताए।
नेपाल ओलम्पिक कमिटिका सदस्य निलेन्द्र राज श्रेष्ठले संचालन गरेको कार्यक्रममा स्वागत मन्तब्य कमिटीका सदस्यले गरेका थिएभने अध्यक्षता सांसद श्रेष्ठले नै गरेका थिए।
