३१ बैशाख २०७६, काठमाडौं
विगत केही वर्षदेखी निर्माण कार्य शुरु गरेर पनि संचालनमा आउन नसकेको नेपाल टेलिकमको टावर संचालनमा आउदा सिन्धुली जिल्लाका फिक्कलवासी सेवाग्राही हर्षित बनेका छन् ।
फिक्कल गाउँपालिका वडा नं ४ को पोटीमा विगत पाँच वर्षदेखि निर्माणकार्य शुरु गरेर संचालनमा आउन नसकेको एनटिसीको टावर गाउँपालिकाको पहलमा संचालनमा आएको फिक्कल गाउँपालिकाका प्रमुख धन बहादुर कार्की (घनश्याम) ले परिवर्तन खबरलाई जानकारी दिएका छन् ।
टावर संचालनमा आएपछि सिन्धुलीमा मात्र नभएर आसपासका जिल्ला ओखलढुंङ्गा, उदयपुर र रामेछाप लगायतका जनताले सेवा लिन सक्ने पालिका प्रमुख कार्कीले बताए ।
पालिका उपप्रमुख पार्वती सुनुवारले टावर संचालनमा नआउँदा कार्यलयमा समेत समयमै विभिन्न सूचना पाउनबाट बञ्चित भएको तर अहिले त्यस समस्याबाट मुक्त भएको बताईन् ।
उपप्रमुख सुनुवारले भनिन्, ”एनसेल प्रयोग गर्न बाध्य थियौं तर अहिले आफू मात्र नभएर पालिकावासीलाई समेत एनटिसीको सिम प्रयोग गर्न प्रोत्साहन गरेका छौं ।”
फिक्कल गाउँपालिका वडा नं ३ का वडाध्यक्ष टेकबहादुर रजन मगरले एनटिसीको टावर संचालनमा नआउदा नेपाललाई नै घाटा भएको बताउँदै कर नतिर्ने एनसेल प्रति आपत्ति रहेको बताए ।
