१४ जेठ २०७६, काठमाडौं
बूढानीलकण्ठ नगरपालिका वडा नं १० स्थित आकाशेधारामा व्यवसायिक गाई फर्ममा आगजनी हुँदा पाच वटा गाई जलेर नष्ट भएका छन् ।
आगजनीबाट गाईलाई खुवाउने पराल, भुष, चोकर र दाना पुर्ण रुपमा नष्ट भएर करिब १० लाख बराबरको क्षति भएको जानकारी कपन प्रहरी प्रभागले परिवर्तन खबरलाई जानकारी दिएको छ ।
सोमबार राति १२ बजे सो गाई फर्ममा विद्युत् सर्ट भई आगजनी हुँदा उक्त फार्ममा पालिएका ७ मध्ये ५ वटा गाई जलेर नष्ट भए भने दुई वटा गाईको उद्धार गर्न सफल भएको बताईएको छ ।
स्थाई वसोबास काभ्रे भएका युवा मिन प्रसाद अधिकारीले केही गर्नुपर्छ भनि हाल बूनपा १० मा गाई फार्म संचालन गरेका थिए ।
विद्युत सर्ट हुँदा फार्म भित्र राखिएको पराल बाट आगो सल्किए पछि महानगरिय प्रहरी प्रभाग कपनका प्रमुख मिन बहादुर कुँवर लगायतको टोली, स्थानीय, र दमकलको सहयोगमा आगो नियन्त्रणमा लिईएको थियो ।
आज बिहान बूनपा उपप्रमुख रमा देवी राई, बूनपा १० का वडाध्यक्ष नवराज भट्टराई लगायत जनप्रतिनिधी र स्थानीयहरुले उक्त फार्मको निरीक्षण गरेका छन् ।
उपप्रमुख रमादेवी राई र वडाध्यक्ष नवराज भट्टराईले नगर र वडाबाट सकेको सहयोग गर्न तयार रहेको बताएका थिए ।
