१२ असार २०७६, काठमाडौँ
यो बर्षको एस्ईईको नतिजा केहि घण्टामा आउँदै गर्दा धेरैको चासो नेकपाकी सांसद शान्ता चौधरी र चर्चित नायिका करिष्मा मानन्धरको नतिजा हेर्नेमा रहेको छ । चौधरी र मानन्धर दुई निकै चर्चित महिलाहरुको नतिजा के होला भन्ने कुरा सबैको चासोको विषय हुनेनै भयो ।
विसं २०७५ चैत १० गतेदेखि सञ्चालन गरिएको एसइई परीक्षाको नतिजा प्रकाशनको तयारी अन्तिम चरणमा पुगेको परीक्षा नियन्त्रण कार्यालय सानोठिमी कार्यालयका उपनियन्त्रक चेतनाथ शर्माले जानकारी दिएका छन ।
कार्यालयले हिजो परीक्षाफल सार्वजनिक गर्ने गरी तयारी गरे पनि केही प्राविधिक काम बाँकी रहेकाले आज बिहीबार परीक्षाफल सार्वजनिक गर्ने गरी काम भइरहेको कार्यालयले जानकारी दिएको छ ।
कार्यालयले आज दिउँसो बोर्ड बैठक बसेर नतिजा सार्वजनिकको तयारी गरेको जनाउँदै प्राविधिक समस्या नआए आज नै नतिजा सार्वजनिक गर्ने जानकारी दिएको छ । यस वर्षको परीक्षामा देशभरबाट कूल चार लाख ७५ हजार तीन परीक्षार्थी परीक्षामा सहभागी भएका थिए ।
