१६ असार २०७६ काठमाडौं
‘श्रमको सम्मान, राष्ट्रको अभियान, भन्ने नाराका साथ देशव्यापी रुपमा संचालन भईरहेको ‘प्रधानमन्त्री रोजगार’ कार्यक्रमको शुभारम्भ आज विशेष समारोहका बीच बूढानीलकण्ठ नगरपालिकाका नगर प्रमुख उद्धव खरेलले गरेका छन् ।
बूनपा वडा नं ८ मा रहेको सार्वजनिक पार्कमा नगरका विभिन्न वडाबाट छानिएर आएका श्रम गर्न चाहने नगरवासीहरुलाई सम्बोधन गर्दै पैसाको लागि भन्दा नगर निर्माणको लागि योगदान पुर्याउन चाहेकोमा नलजाई काम गर्न अनुरोध गरे ।
आजबाट शुरु भएको प्रधानमन्त्री रोजगार कार्यक्रम यो वर्ष १० दिन संचालन हुने छ भने प्रतिदिन रु ९६० का दरले श्रम बापतको पैसा पाउने छन् ।
कार्यक्रममा सहभागी हुन बूनपा ८ का सम्भवत सबै भन्दा ज्येष्ठ ५२ वर्षिय दिनेश कुमार पाण्डे र ८ कै सबै भन्दा कम उमेरकी १८ वर्षिय मनिषा थापा समेत छानिएका छन् । छानिएका नगरवासीले घरधुरी तथ्याङ्क संकलन, व्यवसाय दर्ता र सरसफाई सम्बन्धी काम गर्ने छन् ।
कार्यक्रम लागु भएका वडा कार्यालयले आफ्नो वडामा काम गर्ने श्रमिकले गरेको कामको अनुगमन र मूल्याङ्कन गर्ने छ ।
नगर प्रमुख उद्धव प्रसाद खरेलको अध्यक्षतामा शुभारम्भ भएको कार्यक्रममा उपप्रमुख रमादेवी राई, प्रमुख प्रशासकिय अधिकृत कुमार कोईराला, विभिन्न वडाका वडाध्यक्षहरु, कार्यपालिका सदस्य, वडा सदस्य लगायतको बाक्लो उपस्थिती रहेको थियो । सम्पूर्ण कामको संयोजन प्रधानमन्त्री रोजगार कार्यक्रम बूढानीलकण्ठका संयोजक सिर्जन अधिकारीले गर्ने छन् ।
