१६ असार २०७६, काठमाडौं
नेपाल ओलम्पिक कमिटी अध्यक्ष तथा प्रतिनिधी सभा सांसद जीवनराम श्रेष्ठ र एशियाली खेलकुद पत्रकार महासंघ (एप्स)का महासचिब तथा पाकिस्तान खेलकुद पत्रकार महासंघका अध्यक्ष अमजद अजिज मलिक बिच काठमाडौमा भेटघाट भएको छ ।
भेटघाटको मुख्य उद्देश्य एप्स र नेपाल ओलम्पिक बिच नेपालमा हुन गइरहेको १३ औं दक्षिण एशियाली खेलकुदको सफल आयोजनाका लागि संयोजन गर्नु रहेको छ । पाकिस्तानमा रहेर खेलकुदमा कलम चलाउने मलिकले खेलकुद सम्बन्धी १४ वटा पुस्तक प्रकाशन गरेका छन भने २५६ हक्की खेलको कमेन्ट्री समेत गरिसकेका छन ।
भेटघाटका अबसरमा अध्यक्ष श्रेष्ठले खेलकुद बिकासका लागि पत्रकारको भूमिका महत्वपूर्ण रहने बताउँदै भने–‘कुनै पनि खेलकुद कार्यक्रम सफलता पूर्बक सम्पन्न गर्न पत्रकारहरुको भूमिका रहन्छ तसर्थ खेलकुद आयोजनाका कुराहरुलाई सकारात्मक र निष्पक्ष रुपमा समाचार सम्प्रेषण गर्न आवश्यक छ ।’
सो अबसरमा अध्यक्ष श्रेष्ठले नेपालमा हुन गइरहेको १३ औं दक्षिण एशियाली खेलकुद सफल बनाउन पत्रकारहरुलाई आग्रह गर्दै साग खेलको आयोजनाका सकारात्मक र निष्पक्ष समाचारका लागि समेत आग्रह गरे ।
अध्यक्ष श्रेष्ठले महासचिब मलिकलाई नेपाल ओलम्पिकका तर्फ बाट मायाको चिनो प्रदान गर्दै एप्स र नेपाल ओलम्पिक मिलेर खेलकुदलाई माथी उठाउन सहकार्य गर्नुपर्ने उल्लेख गरे ।
सो अबसरमा नेपाल खेलकुद पत्रकार मंचका पूर्ब अध्यक्ष निरजंन राजबंशी र अजय फुयाल र बरिष्ठ फोटो पत्रकार सुदर्शन रंजितको समेत उपस्थिती रहेको थियो ।
