शिल्पा पोखरेल भन्छिन्, ‘न फुर्सद छ न फिल्म नै’

१७ असार २०७६, काठमाडौँ

शिल्पा पोखरेल म्यूजिक भिडियोमा निकै जमेकी नायिका हुन् । म्यूजिक भिडियोमा दर्शकको अपार माया पाएपछि उनी चलचित्रमा आएकी हुन् । उनले छविराज प्रोडक्सनको चलचित्र लज्जा बाट आफ्नो अभिनय यात्रा सुरु गरेकी थिइन् । पहिलो चलचित्रमा नै उनको कामले दर्शकको मन जित्यो ।

त्यसपछि उनले छविराज प्रोडक्सनकै हवल्दार सुन्तली चलचित्रमा काम गरिन् । उक्त चलचित्र पनि हिट भयो र शिल्पाले चर्चा पनि पाइन् । त्यसपछि पनि उनले धेरै चलचित्रमा काम गरिन् तर विडम्बना उनी सफल हुन सकिनन् । वास्तवमा भन्ने हो भने छविराज प्रोडक्सनका बाहेक शिल्पाले अन्य व्यानरमा खेलेका चलचित्र त्यति सफल छैनन् ।

अहिले पनि शिल्पा केही म्यूजिक भिडियोमा भने देखिरहेकी हुन्छिन् । तर चलचित्रमा भने उनी खासै व्यस्त छैनन् । शिल्पाले अब आफू संख्यामा भन्दापनि गुणस्तरमा धेरै ध्यान दिने बताएकी छिन् । उनले थोरै तर राम्रो चलचित्रमा काम गर्ने बताइन् । शिल्पा अहिले आफ्नै होम प्रोडक्सनको चलचित्रको तयारीमा व्यस्त भएको बताइरहेकी छिन् । उनले त्यस चलचित्र फाइनल नभएसम्म अन्य चलचित्रमा हात नहाल्ने सोचमा रहेको पनि बताइन् ।