चैत्र २८ मा अनमोल र प्रदिपको महाभिडन्त हुदैँ !

३१ असार २०७६, काठमाडौँ

प्रदिप खड्का यतिबेला आफ्नो पुरा मेहेनत चलचित्र प्रेमगीत ३ मा लगाइरहेका छन् । प्रेमगीत ३ कै लागि उनले साइन गरेका धेरै चलचित्रको छायांकन थाती पनि राखेका छन् । प्रेमगीत ३ यो बर्षको सबैभन्दा प्रतिक्षित चलचित्र हो । चैत्र २८ मा आउने भनिएको प्रेमगीत ३ को यतिबेला स्क्रिप्टको काम भैरहेको छ ।

यस्तै यतिबेला बजारमा प्रेमगीत ३ सँगै अर्को चलचित्र पनि जुध्ने हल्ला चलेको छ । केहीदिन अघिमात्र भुवनले आफ्नो नयाँ चलचित्रको घोषणा गरेका छन् । काजल फिल्मसको ब्यानरमा बन्ने चलचित्रमा अनमोल केसी मुख्य भूमिकामा फाइनल भैसकेको भुवनले बताएका छन् । भने सोही चलचित्रमा भुवन भिलेनको भूमिकामा पनि देखिने भएका छन् । बाबुछोरा पहिलो पटक पर्दामा एकसाथ देखिन लागेका छन् । त्यसैले पनि यो चलचित्र दर्शकको लागि विशेष बन्ने देखिन्छ ।

भूवन उनले निर्माण गर्ने चलचित्र चैत्र २८ मा रिलिज गर्ने बताइरहेका छन् । तर उनको टिम भने यो चलचित्र अरु चलचित्रसँग जुधाउने पक्षमा छैन । यदि भुवनले चैत्र २८ मा नै रिलिज गर्ने निर्णय लिए भने चैत्र २८ यो बर्षको सबैभन्दा ठूलो भिडन्त हुनेछ । २ सुपरस्टारको चलचित्र एकसाथ जुध्नु राम्रो भने होइन । यसले दुवै चलचित्रलाई घाटा हुन्छ । तर भूवनले फाइनल डिसिजन भने लिइसकेका छैनन् ।