०३ साउन २०७६, काठमाडौं
बूढानीलकण्ठ नगरपालिका वडा नंं. १० को आयोजनामा ‘प्रथम वडा अध्यक्ष अन्तरटोल सुधार समिति फुटसल प्रतियोगिता २०७६’ सुरु भएको छ ।
ग्रीनवीच फुटसल आकाशेधारामा बूढानीलकण्ठ नगरपालिका उपप्रमुख रमादेवी राईको प्रमुख आतिथ्यतामा उद्घाटन गरिएको फुटसल प्रतियोगितामा बूनपा वडा नं. १० भित्रका ८ टिमको सहभागिता रहेको छ ।
दुई दिनसम्म चल्ने फुटसल प्रतियोगिताको उद्घाटन खेलमा सुनगाभा टोल सुधार समितिले ५–१ गोल अन्तरले आशिर्वाद टोल सुधार समितिलाई पराजित गरेको छ भने लगत्तै भएको दोस्रो खेलमा मनकामना टोल सुधार समितिले प्रगति टोल सुधार समितिलाई २–० गोल अन्तरले पराजित गरेको थियो ।
तेस्रो खेलमा सहभागी टोली उपस्थित नभएपछि शान्ति सृजना टोल सुधार समितिले नकआउट चरणको खेल नखेली सिधै सेमिफाइनलमा प्रवेश गरेको छ । भने चौथो खेलमा माउन्ट कैलाश टोल सुधार समितिले गैरीगाउँ टोल सुधार समितिलाई ६–४ गोल अन्तरले पराजित गरेको छ ।
उक्त अवसरमा बूनपा वडा नं १० का वडाध्यक्ष नवराज भट्टराई, जिल्ला खेलकुद विकास समितिका अध्यक्ष धुर्वराज न्यौपाने, पूर्व गाविस अध्यक्ष मिठाराम अधिकारी, वडा सदस्य चन्द्रमान श्रेष्ठ, दिलकुमारी विक लगायतको उपस्थिति रहेको थियो ।
कार्यक्रमको औचित्य माथि वडाअध्यक्ष नवराज भट्टराईले प्रष्ट्याउँदै टोल सुधार समिति बिच हुने यस्तो खेलको कार्यक्रमले आपसी सद्भाव कायम गरि सम्बन्ध स्थापित हुने बताए ।
वडाध्यक्ष भट्टराईले टोलको गतिविधिमा प्रतिस्पर्धात्मक ढंगले उत्कृष्टता हासिल गर्ने मान्यता स्थापित हुने हुँदा आउदो वर्ष अझ बढी संख्यामा प्रतिस्पर्धा गराउने तथा संयुक्त रुपमा टोल विकासका योजना अगाडी लाने विश्वास व्यक्त गरेका थिए ।
युवा संजालका अध्यक्ष तथा कार्यक्रम संयोजक आकास श्रेष्ठको अध्यक्षतामा भएको कार्यक्रममा स्वागत मन्तव्य वडासदस्य चन्द्रमान श्रेस्ठले राखेका थिए ।
