बहुप्रतिक्षित चलचित्र ‘हजार जुनीसम्म’ को ट्रेलर रिलिज, आर्यनको जोडी स्वस्तिमा ?

१० साउन २०७६, काठमाडौँ

यो बर्षको बहुप्रतिक्षित चलचित्र हजार जुनीसम्म को अफिसियल ट्रेलर सार्वजनिक भएको छ । यसअघि चलचित्रको २ गीत सार्वजनिक भएका थिए । जसलाई दर्शकले अत्यन्तै रुचाएका थिए । गीतलाई जस्तै ट्रेलरलाई पनि दर्शकले मन पराउने कुरामा निर्माण टिम ढुक्क रहेको छ ।

हजार जुनीसम्म को ट्रेलर हेरेर चलचित्रको कथा बुझ्न भने निकै गाह्रो छ । किनकी ट्रेलर यति कन्फ्युजिङ खालको बनाइएको छ कि चलचित्रमा कसको जोडी को भनेर छुट्याउनै सकिदैँन । चलचित्र हजार जुनीसम्म को ट्रेलरमा हामीले आर्यन सिग्देल, स्वस्तिमा खड्का, सलोन बस्नेत, अनुभव रेग्मी, अखिलेष प्रधान, सञ्चिता लुईटेल, शिवहरि पौडेल लगायतका कलाकारलाई देख्न सक्छौँ । तर प्रियंका कार्कीलाई भने कतैपनि देखाइएको छैन ।

प्रियंका चलचित्रको पोष्टरमा पनि कतै देखिएकी थिइनन् । यो चलचित्रको कथा सस्पेन्समा राखिएको स्पष्ट हुन्छ । चलचित्र हजार जुनीसम्म साउन ३० बाट देशव्यापी रुपमा प्रदर्शनमा आउँदै छ ।