१५ साउन २०७६, काठमाडौँ
अभिनेता आर्यन सिग्देल यतिबेला चलचित्र हजार जुनीसम्म को प्रमोशनमा व्यस्त छन् । हजार जुनीसम्म मा आर्यनको २ भिन्न लुक्स देख्न सकिन्छ । एउटामा आर्यन सदा झैँ लबर ब्वाईको भूमिकामा देखिएका छन् भने अर्कोमा उनलाई निकै बुढो रुपमा देख्न सकिन्छ ।
पछिल्लो समयमा आर्यनका चलचित्रले सोचेजस्तो व्यापार गरिरहेको छैन । त्यसैले यो चलचित्र आर्यनका लागि निकै विशेष छ । आर्यनले हजार जुनीसम्म बाट आफूले निकै आशा बोकेको पनि बताएका छन् ।
चलचित्र हजार जुनीसम्म मा आर्यनसँगै स्वस्तिमा खड्का, अखिलेष प्रधान, सलोन बस्नेत, सञ्चिता लुईटेल, अनुभव रेग्मी, शिवहरि पौडेल, प्रियंका कार्की लगायतका कलाकारको मुख्य भूमिका रहेको छ । चलचित्रको दुई गीत र ट्रेलर सार्वजनिक भैसकेको छ । जसलाई दर्शकले निकै रुचाएका छन् ।
