१८ साउन २०७६, काठमाडौं
बूढानीलकण्ठ नगरपालिका शिक्षा समितिको आयोजनामा सम्पन्न अन्तरक्रिया कार्यक्रममा बूढानीलकण्ठ नगरप्रमुख उद्धवप्रसाद खरेलले आफ्नो नगरभित्रका निरक्षरहरुको तथ्यांक संकलन गरी साक्षर बनाउने अभियान थाल्ने भएका छन् ।
नेपाल सरकारको साक्षरता अभियानलाई साकार बनाउन प्रमुख खरेलले नगरपालिकाले १५ दिनभित्र फाराम र कार्ययोजना बनाई नगरक्षेत्रभित्र बसोबास गर्ने १५ देखि ६० बर्ष उमेर समूहका सम्पूर्ण नागरिकहरुको तथ्यांक संकलन गरी निरक्षर सबैलाई साक्षर बनाउने घोषणा गरेका छन् ।
यसको लागि नगरपालिकाले नगरप्रमुखकै नेतृत्वमा साक्षरता समिति बनाउने र प्रत्येक वडाका वडाध्यक्षहरुले वरपरका विद्यालयहरु मार्फत निरक्षरहरुको तथ्यांक संकलन गरी विद्यालय, वडाकार्यालय र सामाजिक संघसंस्थाको संयुक्त पहलमा घरघरमा गएर, टोलटोलमा जम्मा गरेर वा विद्यालयहरुमा पढाएर सबैलाई साक्षर बनाउने अभियान संचालन गर्ने भएको छ ।
कार्यक्रममा नगरप्रमुख खरेल सहित उपप्रमुख रमादेवी राई, बूनपा शिक्षा शाखा उपसचिव जगन्नाथ उपाध्याय, विभिन्न वडाका वडाध्यक्ष, अभिभावक महासंघ, शिक्षक संघसंगठन, प्याब्सन एनप्याब्सनका प्रतिनिधि लगायत स्थानीय समाजसेवीहरुको बाक्लो उपस्थिति रहेको थियो ।
शिक्षा समिति सदस्य निम काजी श्रेष्ठले संचालन गरेको कार्यक्रममा स्वागत मन्तव्य सामाजिक विकास समितिका संयोजक तथा वडा नं. ९ का वडाध्यक्ष राजेन्द्र प्रसाद सापकोटा, विषय सन्दर्भ मन्तव्य शिक्षा उपसमिति संयोजक बाबुकाजी श्रेष्ठले राखेका थिए ।
