०३ भदौ २०७६, न्यूयोर्क
न्युयोर्क स्थित क्विन्स वुडसाइडमा नेपाली समुदायलाई जनगणना सम्बन्धि जनचेतना फैल्याउने उद्देश्यले अगष्ट १८, २०१९ मा स्थानीय नेपाली संघसंस्थाहरुको संयुक्त आयोजनामा एक जनचेतना कार्यक्रम आयोजना सम्पन्न गरिएको छ । आगामी सन् २०२० मा संयुक्त राज्य अमेरिकामा जनगणना सम्पन्न हुँदैछ ।
प्रत्येक १० वर्षमा आयोजना गरिने अमेरिकी जनगणनामा यस वर्ष नेपाली समुदायलाई सक्रिय रुपमा परिचालन गर्नको निम्ति विभिन्न संघसंस्थाहरुले संयुक्त रुपमा जनचेतना कार्यक्रम आयोजना गरेको आयोजक मध्येका एक संस्था तामाङ समाज अमेरिकाका अध्यक्ष सानुमाया तामाङले बताएकी छिन् । ‘अमेरिकी जनगणना २०२० तथा सामुदायिक जनचेतना कार्यक्रम’ नाम दिइएको यस चेतनामुलक कार्यक्रमका स्थानीय दशवटा संघसंस्थाहरुले संयुक्त आयोजना गरेका थिए ।
आयोजक संस्थाहरु क्रमशः तामाङ समाज अमेरिका, मधेशी एशोसियसन इन अमेरिका ग्रेटर न्युयोर्क च्याप्टर, दोलखा श्यामा शेर्पा एशोसिएसन इन अमेरिका, शेर्पा एशोसिएसन इन अमेरिका, रिजवुड नेप्लिज सोसाइटी, दर्शन ठकुरी समाज अमेरिका, बाग्लुङ्ग सेवा समाज अमेरिका, नेवाः नखः न्युयोर्क, बलेवा समाज अमेरिका र भोजपुर समाज अमेरिका रहेका छन् ।
जनचेतना कार्यक्रम अमेरिकी जनगणना ब्युरो न्युयोर्क केन्द्रको पार्टनरसिपमा आयोजना गरिएको आयोजकले बताएका छन् । अमेरिकी जनगणना ब्युरो न्युयोर्क केन्द्रको पार्टनरसिप स्पेसलिष्ट जिन डब्ल्यु किमको प्रस्तुती र लोप्साङ् टि. सालाकाको नेपाली अनुवाद सहित कार्यक्रम आयोजना गरिएको थियो । कार्यक्रममा जनगणनाको महत्व र जनगणनामा छुट्न गएमा त्यसबाट पर्न सक्ने सामुदायिक असरको बारेमा पार्टनरसिप स्पेसलिष्ट जिन डब्ल्यु किमले कार्यपत्र मार्फत प्रस्तुत गरेका थिए । लगभग तीन घण्टा चलेको कार्यक्रम अवधिभरि नेपाली समुदायका अगुवा एवं संघसंस्थाका प्रतिनिधिहरुले कार्यपत्र प्रस्तुतकर्ता किमलाई आ–आफ्नो जिज्ञासा राखेका थिए ।
कार्यक्रमको अन्त्यमा सहभागी आयोजक संस्थाहरुको संयुक्त पहलमा तामाङ समाज अमेरिकाको अध्यक्ष सानुमाया तामाङको संयोजकत्वमा ‘सेन्सस २०२० कम्युनिटी अवेरनेस कमिटी’ गठन गरेको छ । यस कमिटीको मुख्य उद्देश्य न्युयोर्कका विभिन्न स्थानहरुमा नेपाली समुदायलाई जनगणना सम्बन्धि जनचेतना फैलाउनु रहेको संयोजक तामाङले बताएका छन् ।
अगष्ट १८, २०१९ देखि नेपाली समुदाय माझ अमेरिकी जनगणना सम्बन्धि जनचेतना फैलाउने कार्य प्रारम्भ गरिएको र यो क्रम २०२० को अन्त्यसम्म रहिरहने संयोजक तामाङले बताएका छन् । कमिटीमा इच्छुक अन्य संघसंस्थाहरुलाई समेत संग्लग्न गर्दै लैजाने र कमिटी बिस्तार गरेर जनगणनाको लागि नेपालीहरुको संयुक्त अभियान संचालन गरिने संयोजक तामाङको भनाई छ । हरेक पटकको जनचेतना कार्यक्रमको संयोजक परिवर्तन भइरहने र संयोजक सम्बन्धित संस्थाको प्रमुख रहने सहमति भएको आयोजक मध्येका एक संस्था दर्शन ठकुरी समाज अमेरिकाका अध्यक्ष मिलन शाहीले बताएका छन् ।
आगामी बैठकबाट संयोजकको भूमिका अर्को संस्थाका प्रमुखलाई हस्तान्तरण गरिने र त्यस संस्थाका प्रमुखले जनचेतना कार्यक्रम संयोजन गर्नुपर्ने व्यवस्था गरिएको अध्यक्ष शाहीले बताएका छन् । रिजवुड नेप्लिज सोसाइटीका अध्यक्ष राजेश भट्टले कमिटीको तर्फबाट अर्को जनचेतना कार्यक्रम आयोजना गर्न आफु तयारी रहेको बताएका छन् । त्यसैगरी मधेशी एशोसिएसन इन अमेरिका ग्रेटर न्युयोर्क च्याप्टरका अध्यक्ष मनोज सिंहले संयुक्त अभियानमा धेरै भन्दा धेरै नेपाली संघसंस्थाहरुलाई समाबेश गरेर लैजानु पर्ने बताएका छन् । अर्को जनचेतना कार्यक्रमको संयोजक नतोकिन्जेल सम्मको लागि सानुमाया तामाङले ‘सेन्सस २०२० कम्युनिटी अवेरनेस कमिटी’ को नेतृत्व गर्नेछिन् ।
