०८ भदौ २०७६, काठमाडौँ
चलचित्र प्रेमगीत ३ यो बर्षको सबैभन्दा प्रतिक्षित चलचित्र हो । नाम नै ब्राण्ड बनिसकेको यो चलचित्रको छायांकन दशैँपछि सुरु हुँदैछ । यतिबेला चलचित्रका कलाकार वर्कसपमा व्यस्त छन् । चलचित्र प्रेमगीत ३ चैत्र २८ बाट देशव्यापी रुपमा प्रदर्शनमा आउने बताइएको छ ।
हिजोमात्र चलचित्रको टाइटल गीत रेकर्ड गराइएको छ । टाइटल गीतमा प्रताप दास र प्रविशा अधिकारीको आवाज सुन्न सकिन्छ । यस्तै प्रेमगीत ३ को टाइटल गीतमा चलचित्रका मुख्य कलाकारले पनि कोरस भरेका छन् ।
‘प्रेमगीत’ सिरिजका निर्माता सन्तोष सेनले गीतलाई स्तरिय बनाउन कुनै कसर नछाडेको बताए । ‘करीब ७० देखि ८० जना बाध्यबाधक राखेर हामीले लाइभ बाजागाजासहित गीत रेकर्ड गराएका हौं । यो गीतले फिल्मको पुरा मर्मलाई समेट्छ, त्यसैले गीतलाई राम्रो बनाउन कुनै कञ्जुसाईं गरेका छैनौं’, उनले भने ।
नेपाल आर्मीबाट अर्केस्ट्रा बजाउने र गुम्बाबाट मन्त्र वाचन गर्ने लामा गुरुहरु ल्याएर गीत रेकर्ड गरिएको उनले बताए । फिल्मको कन्टेन्ट हेभी भएका कारण गीत पनि त्यही अनुसार रेकर्ड गराइएको निर्माता सेनको भनाई छ । शिर्ष गीतको भिडियो पनि आकर्षक बनाइने उनी बताउँछन् । चलन चल्तीको रेकर्डिङ शैलीभन्दा विल्कुलै पृथक किसिमले रेकर्ड गराइएको गीतमा केही दृष्टिविहीन गायक-गायिकाहरुको पनि कोरस गायन छ । निर्माता सेन यो नेपालको सबैभन्दा ठूलो रेकर्डिङ रहेको बताउँछन् ।
