१६ भदौ २०७६, काठमाडौं
स्पेनिस ला लिगामा रियल मड्रिड भिल्लारियलसँग बराबरीमा रोकिएको छ।
भिल्लारियलको मैदानमा भएको खेलमा घरेलु टिमले दुई पटक लिएको अग्रतामा ग्यारेथ बेलले गोल गर्दा रियलले २–२ गोलको बराबरीमा अंक खोसेको हो।
खेलको १२औं मिनेटमा जेरार्ड मोरेनोले गोल गर्दै भिल्लारियललाई अग्रता दिलाएका थिए। पहिलो हाफको अन्तिम समयमा बेलले गोल गर्दै खेल बराबरीमा पुर्याए।
खेलमा रियल मड्रिडले घरेलु टिमलाई निकै दबाब दिएको थियो। दोस्रो हाफमा टोनी क्रिजको प्रयासलाई भिल्लारियल गोलकिपरले उत्कृष्ट बचाउ गरे।
७४औं मिनेटमा मोई गोमेजले गोल गर्दै फेरी भिल्लारियललाई अग्रता दिलाए। मोरेनोले नजिकबाट गरेको प्रहार रियलका गोलकिपर कोर्ट्वाले बचाएका थिए। त्यसपछिको रिबाउण्ड बलमा गोमेज बार्डोनाडोले गोल गर्दै फेरी भिल्लारियललाई अग्रता दिलाए।
८६औं मिनेटमा ग्यारेथ बेलले गोल गर्दै फेरी खेल बराबरीमा पुर्याए। इन्ज्युरी समयको अन्तिम दुई मिनेटभित्र बेलले दुईवटा पहेँलो कार्ड पाउँदा रियल मड्रिडले केही सेकेण्ड खेल १० खेलाडीमा खेलेको थियो।
