०४ असोज २०७६, काठमाडौँ
यो बर्षको निकै प्रतिक्षित चलचित्र कबड्डी कबड्डी कबड्डी हिजो संविधान दिवसको अवसर पारेर देशव्यापी रुपमा प्रदर्शनमा आएको छ । पछिल्लो समयमा नेपाली चलचित्रको व्यापार त्यति राम्रो देखिएको थिएन । आशा गरेका चलचित्रले समेत कमजोर व्यापार गर्दा फिल्मकर्मीहरु निराश बनेका थिए ।
कबड्डी कबड्डी ले हलमा आउन छोडेका दर्शकलाई हलसम्म तान्न सफल भएको छ । त्यतिमात्र नभएर कबड्डी कबड्डी कबड्डी यो बर्षको सबैभन्दा ठूलो ओपनिङ गर्ने फिल्म नै कबड्डी कबड्डी कबड्डी बनेको छ ।
कबड्डी कबड्डी कबड्डी ले ग्राण्ड ओपनिङ मात्र गरेको छैन । चलचित्र हेरेका अधिकांश दर्शकले चलचित्र निकै राम्रो भएको प्रतिक्रिया दिइरहेका छन् । आज शनिबार भएकाले चलचित्रको व्यापार अझै आक्रमक हुने देखिएको छ ।
राजधानी र मोफसलका अधिकांश मल्टीप्लेक्सहरुमा कब्जा जमाएको यो फिल्मले शुक्रबार क्यूएफएक्स चेनमा बिहानदेखि साँझसम्म ९५ प्रतिशतको आसपासमा अकुपेन्सी कायम गरेको जानकारी प्राप्त छ । क्यूएफएक्सले आफ्नो देशभर छरिएका ९ स्टेशनमा शुक्रबारका लागि कुल ६२ सोज बाँडेको थियो । राजधानीका पाँच स्टेशनमा फिल्मलाई बाँडिएको ३८ सोज शुक्रबार सबै हाउसफुल भए । भने, मोफसलका स्टेशनमा पनि दर्शक भरिभराउ देखिए ।
