१४ असोज २०७६, काठमाडौं
अमेरिकामा १८ देखि ४४ वर्षका ३० लाख ३० हजार महिलाले किशोरावस्थामा नै बाध्यात्मक यौन सम्बन्ध स्थापित गर्नु परेको एक अध्ययनले खुलाएको छ।
जामा इन्टरनल मेडिसिनमा प्रकाशित मेडिकल जर्नलले विश्व स्वास्थ्य संगठनले ‘बाध्यकारी यौन सम्बन्ध’लाई एक प्रकारको यौन हिंसा बताएको छ।
‘यसलाई बलात्कारको संज्ञा दिँदा ठिक होला भन्ने हामीलाई लाग्छ,’ डा.लाउरा हक्सले भनिन्, उनी हार्भाड मेडिकल स्कूलका प्राइमरी केयर फिजिसियनका साथै यो शोधकी मुख्य अनुसन्धानकर्तामध्येकी एक हुन्।
उक्त शोधमा ६.५ प्रतिशत महिलाले पहिलो पटक यौन सम्बन्ध आफ्नो इच्छाविपरित स्थापित गर्नुपरेको बताएका छन्। अनुसन्धानकर्ताले १६ मध्ये एक अमेरिकी महिलाले आफ्नो इच्छाविपरित बाध्यात्मक स्थितीमा परेर पहिलो पटक यौन सम्बन्ध स्थापित गरेको बताएका हुन्।
बाध्यात्मक यौन सम्बन्ध स्थापित गर्ने औसत उमेर १५.६ वर्ष भएको अनुसन्धानले बताएको छ। यद्यपि, पार्टनर वा पीडकको उमेर ६ वर्ष जेठो देखिएको हो। जसले स्वेच्छिक यौन सम्बन्ध स्थापित गरे उनीहरुको औसत उमेर १७.४ रह्यो।
अनुसन्धानमा संलग्न ५० प्रतिशत महिलाले पीडक आफूभन्दा अत्यधिक ठूलो र उमेरदार भएको पनि बताए ५६ प्रतिशत महिलालाई पुरुषहरुले मौखिक दबाब दिएको बताए भने २६ प्रतिशत पुरुषहरुले कुटपिट गरेर धम्की दिएको र २५ प्रतिशतले चोट र्पुयाएको अनुसन्धानमा उल्लेख छ।
यस्तै, २२ प्रतिशत महिलालाई ड्रग्स समेत खुवाइएको बताए।
३० प्रतिशत बढीले पहिलो गर्भ अनेच्छुक रहेको बताए भने २४ प्रतिशतले गर्भपतन गरेको बताए।
‘कुनै पनि यौन हमला (लिङ्ग प्रवेश) जुन कसैको इच्छा विपरित भएको छ भने त्यो बलात्कार नै हो। यदि कसैले यौन सम्बन्ध स्थापित गर्नका लागि मौखिक दबाब दिन्छ भने त्यो पनि बलात्कार जत्तिकै हो,’ मुख्य लेखक डा. लौरा हक्सले बताइन् ।
