१८ असोज २०७६, काठमाडौं
चिनियाँ राष्ट्रपति सी जिनफिङको नेपाल भ्रमणका राजधानी काठमाडौं धमाधम सिंगारिँदैै छ ।
लामो समयदेखि हुन नसकेको चिनियाँ राष्ट्रपति तहको भ्रमण लगभग पक्का भएपछि सरकारले त्रिभुवन अन्तर्राष्ट्रिय विमान स्थल देखि सोल्टी होटल र सोल्टी होटल देखि सितल निवास सम्मका सडकहरु धमाधम कालोपत्रे, रङरोगन, बगैंचा निर्माण, सरसफाई लगायतका कामहरु भईरहेका छन् ।
राष्ट्रपति सी भ्रमणको आउने दिन सार्वजनिक नगरेको भएपनि आँखाले देखिने तयारीका कारण दशैं लगत्तै भ्रमण हुने सम्भावना देखिन्छ ।
बानेश्वर आसपासको सडकमा रङ लगाईरहेका धुलिखेल निवासी ४२ वर्षिय विष्णु गौतमले खाना खाएर दैनिक ८ सय ज्यालामा काम गरिरहेको बताए । सी भ्रमणबारे जानकारी नपाएका गौतमले दशैको कारण शहर रङरोगन गरिएको हुन सक्ने बताए ।
गौतमसँगै काम गर्ने मेलम्चीका आकाश केसीले आज रातभरी, भोलि दिनभरी र टीका लगाएर समेत काम गरिरहने बताए भने गौतम अष्टमी मनाउन भोली धुलीखेल जादैछन् ।
नेपाल टेलिकमले बनाएको बानेश्वर बगैंचामा विरुवा छाट्दै गरेका शुरेस अधिकारीले पोखरा घर भएपनि यसपालिको दशैं काठमाडौंमै मनाउने र सुख्खा १२ सयमा दैनिक काम गरी दशैं खर्च जोहो गर्न काम गरेको बताए ।
सडक मर्मत गर्न किन सी भ्रमण नै चाहियो भन्ने प्रश्नमा सडक विभागका महानिर्देशक केशव कुमार शर्माले भने,”वर्षाको कारण काम गर्न पाईरहेका थिएनौ । उच्च स्तरीय भ्रमणले उर्जा थप्यो । देशकै राजधानी भएकोले यसपटक काठमाडौंका सडकहरु उच्च प्राथमिकतामा छन् । राष्ट्रपति भ्रमण पछि पनि निरन्तर काम अगाडि बढ्ने छ ।”
