फलफूल उपहार दिएको आरोपपछि जापानी मन्त्रीको राजीनामा

०८ कार्तिक २०७६, काठमाडौं

जापानका नवनियुक्त व्यापारमन्त्रीमाथि निर्वाचन कानून उल्लंघन गरेको आरोप लागेपछि उनले राजीनामा दिएका छन्।

इसु सुगावाराले टोकियोका आफ्ना मतदाताहरूलाई महँगो फलफूल र गँगटो उपहार दिएका समाचार पत्रपत्रिकाहरूले लेखेका थिए। उनले एक समर्थकको परिवारलाई समवेदना जनाउन २० हजार जापानी येन दिन खोजेको बताइएको छ।

जापानको निर्वाचन कानूनले राजनीतिज्ञहरूलाई आफ्नो मतदाताहरूलाई चन्दा दिन रोक लगाएको छ। साप्ताहिक पत्रिका शुकान बुन्सुनले सुगावाराको सहयोगीले एकजना मतदाताको मृत्यु भएपछि उनको परिवारलाई २० हजार येन दिन खोजेको लेखेपछि यी आरोपहरू सार्वजनिक हुन थालेका बीबीसीले जनाएको छ।

जापानमा मृतकको परिवारलाई पैसा दिनु सामान्य चलन हो। सो पत्रिकाले सुगावाराले पठाएको उपहारहरूको सूची र उनलाई धन्यवाद भनिएका पत्रहरू प्रकाशित गरेको थियो।

सुगावाराले शुक्रबार आफूले निर्वाचन कानून उल्लघंन गरेको हो कि होइन भन्ने कुरा अध्ययन गरिरहेको तर राजीनामा भने दिने निर्णय गरेको बताएका छन्।

“म मेरो समस्याको कारणले संसद्‍मा हुने छलफल ढिला होस् भन्ने चाहन्न,” सुगावाराले बताए।