२० कार्तिक २०७६, काठमाडौँ
बलिउडका निकै चर्चित एवम् सफल नायक गोविन्दा हिजोमात्र नेपाल आएका छन् । उनी विरगञ्जमा आयोजना हुन लागेको स्वर्णिम चलचित्र महोत्सवका लागि नेपाल आएका हुन् । गोविन्दासँगै उनकी श्रीमती सुनिता अहुजा र नेपाली चलचित्र क्षेत्रकी सफल नायिका निरुता सिंह पनि स्वर्णिम चलचित्र महोत्सवका लागि नेपाल आएका छन् ।
सुनिताले आफू हरेक बर्ष पशुपतिमा पूजा गर्नको लागि नेपाल आउने गरेको बताइन् । यस्तै गोविन्दा पनि नेपाल आइरहेका हुन्छन् । हिजोपनि नेपाल टेक्ने बित्तिकै उनले निकै खुसी लागेको बताए ।
गोविन्दाले नेपाली दर्शकले आफूलाई दिएको मायाप्रति सधैँ नै निकै आभारी भएको बताए । उनले भने–‘जुन खालको माया र प्रेम तपाइहरुले मलाई दिनुभएको छ, यसका लागि म निकै नै आभारी छु ।’ गोविन्दाले आफ्नो चलचित्र हेर्दै आएका दर्शकलाई पनि धेरै माया रहेको बताए । स्वर्णिम चलचित्र महोत्सवमा सहभागी हुन पाउँदा खुशी लागेको भन्दै उनले दर्शकको माग अनुसार नै प्रस्तुति दिने बताए ।
