चैत्र २८ मा ‘प्रेमगीत ३’ सँगै पूजा र आकाशको ‘मन परेसी पर्यो पर्यो’ पनि रिलिज हुदैँ, कसले मार्ला बाजी ?

०५ मंसिर २०७६, काठमाडौँ

पूजा र आकाशले पहिलो पटक चलचित्र ‘रामकहानी’ मा एकसाथ काम गरेका थिए । त्यहिबाट नै पूजा र आकाशको जोडीलाई दर्शकले औधी रुचाएका थिए । त्यसपछि उनीहरुले लगातार सँगै काम गरिरहेका छन् ।

केहीसमय अघि पूजा र आकाश अभिनीत चलचित्र ‘पोई पर्यो काले’ प्रदर्शनमा आएको थिए । यस्तै उनीहरुले ‘सम्हालिन्छ कहिले मन’ मा पनि एकसाथ काम गरेका छन् भने केहीसमय अघि ‘सम्झना बिर्सना’ चलचित्र साइन गरेका छन् । जसको छायांकन चाडै नै सुरु हुदैँछ । यसैबिचमा फेरि पूजा र आकाशले नयाँ चलचित्र साइन गरेका छन् ।

‘मन परेसी पर्यो पर्यो’ नामक चलचित्रमा पूजा र आकाश अनुबन्धित भएका हुन् । चलचित्रलाई रघु परियारले निर्माण गर्दैछन् भने रुपेश थिङ तामाङले निर्देशन गर्दैछन् ।

पुसको अन्तिमबाट छायांकनमा जाने बताइएको चलचित्रको फ्लोरमा नजादैँ रिलिज डेट समेत तय गरिएको छ । यो चलचित्र आउँदो चैत्र २८ गते रिलिज गर्ने घोषणा निर्माण टिमले गरिसकेको छ ।

सोही मितिमा यस बर्षको बहुप्रतिक्षित चलचित्र ‘प्रेमगीत ३’ रिलिज हुने घोषणा पहिले नै भएको हो । यस अर्थमा एकपटक फेरि बक्सअफिसमा पूजा र प्रदिपको महाभिडन्त हुने देखिएको छ । अब दर्शकले कसको चलचित्रलाई धेरै रुचाउने हुन् त्यो हेर्न भने चैत्र २८ पर्खनै पर्छ ।