१० मंसिर २०७६, काठमाडौँ
रानु मण्डल अहिलेकी चर्चित गायिका हुन् । रेलवे स्टेशनमा गीत गाउने रानु मण्डललाई आज हिमेशले स्टार बनाइदिएका हुन् । यस्तै रानु यतिबेला हिमेशसँग आफ्नो तेस्रो गीतको तयारी गरिरहेकी छिन् ।
कुनै समयमा रानुलाई मागेर खानुपर्ने अवस्था थियो । अहिले भने उनले आफ्नो काम सम्हाल्नको लागि म्यानेजर राखेकी छिन् । अहिले रानुका सम्पूर्ण काम उनका म्यानेजरले नै गर्ने गरेका छन् । रानुले आफूले त फोन समेत बोक्ने नगरेको बताइन् ।
रानुले भनिन्, ‘मलाई मानिसहरुले मन पराइरहेका छन्, खुसी लागिरहेको छ । अब मानिसहरु मसँग काम गर्न चाहिरहेका छन् ।
अब मैले यो कामकाज हेर्नका लागि जिम्मेवारी अतिन्द्रलाई दिएकी छु । म यो उमेरमा सबै कुरा हेर्न सक्दिन । उनले मलाई सहयोग गरिरहेका छन् र बाटो देखाइरहेका छन् । उनी मेरो छोराजस्तै हुन् ।’ अतिन्द्र तिनै व्यक्ति हुन् जसले रानुको भिडियो बनाएर सामाजिक सञ्जालमा अपलोड गरिदिएका थिए र सोही भिडियोका कारण रानु रातारात चर्चित भएकी थिइन् ।
