२० पुष २०७६, काठमाडौँ
जनवरी १० बाट प्रदर्शनमा आउन लागेको चलचित्र छपाक को प्रमोशनमा यतिबेला नायिका दिपिका पादुकोण निरन्तर लागिरहेकी छिन् । यो चलचित्रकी मुख्य पात्र नै दिपिका हुन् ।
यो चलचित्र केहीसमय अघि कानूनी झमेलामा समेत परेको थियो । एक फिल्ममेकरले छपाक को स्टोरी चोरी भएको आरोप लगाएका थिए । उजुरीकर्ता राकेश भारतीले फिल्मको प्रोमो हेरेरै ‘छपाक’ आफूले लेखेको स्किृप्टमा आधारित भएको थाहा पाएको बताउँदै आएका छन् ।
उजुरीमा राकेशले एसिड आक्रमण पीडितमाथि आफूले फिल्म बनाउन चाहेको खुलाएका छन् । उनले उक्त फिल्मको स्किृप्ट दर्ता पनि गराएका थिए ।
राकेशले यो चलचित्रका लागि प्रियंका चोपडा, कंगना रणावत, श्रद्धा कपुर, अनुष्का शर्मा र ऐश्वर्या रायको नाम फाइनल गरेका थिए । प्रियंकालाई यो चलचित्रको कथा मन परेका कारण उनी यस चलचित्रमा लगानी समेत गर्न चाहन्थिन् तर उनी बाहिर भएका कारण समय मिलाउन सकिनन् ।
यस्तै श्रद्धा कपुर र अनुष्का शर्माले व्यस्तताका कारण यो चलचित्रमा काम गरेनन् । कगंनाको दिदीमाथि पनि कुनै समयमा एसिड प्रहार भएको थियो । जसका कारण कगंनाले आफू भावुक हुने बताउँदै यो चलचित्रमा काम गरिनन् । यस्तै ऐश्वर्याले भने पर्दामा एसिड आक्रमण भएकी युवतीको भूमिकामा आफू नराम्री देखिने भएकाले यो चलचित्र नगरेको बताइएको छ । यो सबै कुराको जानकारी राकेशले नै दिएका हुन् ।
