२२ पुष २०७६, काठमाडौं
१ सय ५९ जनामाथि यौन उत्पीडनको आरोप लागेका एक युवकलाई जन्मकैदको सजाय तोकिएको छ । तीमध्ये १ सय ३६ जनालाई उनले बलात्कार नै गरेका थिए ।
रेहनार्ड सिनागामाथि ४८ जना पुरुषलाई आफ्नो फ्ल्याटसम्म ल्याएको, उनीहरुलाई ड्रग्स खुवाएर उत्पीडन गरेको र उक्त घटनालाई क्यामरामा कैद गरेको आरोप लागेको थियो जुन पुष्टि भएको छ ।
पुलिसले ३६ वर्षे सिनागाले कम्तीमा १ सय ९० जनालाई पीडित बनाएको प्रमाण आफूसँग भएको जानकारी दिएको छ ।
द क्राउन अभियोजन सेवा (सिपीएस) ले सिनागालाई बेलायती इतिहासमा सबैभन्दा धेरैलाई बलात्कार गर्ने व्यक्तिको संज्ञा दिएको छ ।
न्यायाधीसले उनको जन्मकैद कम्तीमा पनि ३० वर्षको हुनुपर्ने आदेश दिएकी छिन् । सोमबारको सुनुवाईमा अदालतले उनको नामसमेत उल्लेख गर्न अनुमती दिएको छ ।
यसअघि सन् २०१८ को गर्मीयाम र गत वर्ष भएका दुईवटा सुनुवाईमा नै पोस्ट ग्राजुएटका विद्यार्थी सेनेगामाथि २० वर्षको जेल सजाय तोकिएको थियो ।
चार भिन्न सुनुवाईमा ती इन्डोनेशियाली नागरिकलाई १ सय ३६ जना माथि बलात्कार, ८ जना माथि बलात्कारको प्रयास, १५ जनामाथि यौन उत्पीडन गरेको आरोपमा दोषी ठहर गरिएको थियो ।
अधिकारीका अनुसार उनीहरुले अन्य ७० जनाको पहिचान गर्न नसकेको र सिनागामार्फत् कुनै पनि अवस्थामा यौन उत्पीडन सहनु परेका जोसुकैलाई पनि सम्पर्कमा आउन अनुरोध गरेको छ ।
सुनुवाईको क्रममा न्यायाधीस सुजेन गोडार्ड क्यूसीले सिनागालाई युवाहरुलाई शिकार बनाउने दुष्ट यौन पिपाषुको संज्ञा दिएकी छिन् ।
सिनागाले कसलाई शिकार बनाउँथे ?
सिनागाले नाइटक्लब र बारबाट निस्किरहेका पुरुषलाई आफ्नो शिकार बनाउथे । उनी ती पुरुषलाई सँगै रक्सी खाऔं र ट्याक्सी बोलाउनका लागि कतै बसौं भनेर मोन्टाना हाउसको उनको फ्ल्याटसम्म पुर्याउने गर्दथे ।
सिनागाले पीडितलाई ड्रग्स दिन्थे र बेहोस भएपछि यौन उत्पीडन गर्दथे । जब पीडित बिहान उठ्थे तब तीमध्ये धेरैलाई आफूमाथि के भएको थियो भनेर पत्तै हुँदैनथ्यो ।
सिनागाले आफूमाथि लागेको सबै आरोप अस्विकार गर्दै उक्त यौन क्रियाकलाप र भिडियो खिच्ने कार्य सहमतीमै भएको बताएका छन् ।
अदालतमा दिएको बयानमा एक पीडितले ‘सिनागाले आफ्नो जीवनको एउटा पाटो नै बर्बाद गरिदिएको’ बताइन् । यस्तै अर्की पीडितले ‘सिनागा कहिले पनि जेलमुक्त नहोस् र नर्कमा नै कुहियोस्’ भनेकी छिन् ।
‘म त्यतिबेला महिनावारी भएकी थिएँ, निकै पीडामा भएका बेला त्यस्तो दिन सहनुपर्यो,’ अर्कीले भनिन् ।
कति पीडितलाई त आफू बलात्कृत भएको थाहा नै थिएन । उनीहरुलाई पुलिसले सम्पर्क गरेपछि मात्र यसबारे थाहा भयो । युनिभर्सिटी अफ लिड्समा पीएचडी गरिरहेका सिनागाले थुप्रै वर्ष अघिदेखि यस्तो कुकृत्य गर्दै आएको हुनसक्ने पुलिसले अनुमान गरेका छन् ।
कसरी खुल्यो पोल ?
यी बलात्कारीलाई सन् २०१७ मा पक्राउ गरिएको थियो । एक व्यक्तिको यौन उत्पीडनको क्रममा होस खुलेपछि सिनागाबाट आफूलाई फुत्काएर पुलिसलाई बोलाएका थिए ।
जब पुलिसले सिनागाको फोन खोसे तब उनले आफ्नो प्रत्येक उत्पीडनको भिडियो खिचेको पत्ता लाग्यो ।
‘हामीलाई शंका छ कि उनले विगत १० वर्षदेखि उत्पीडन गर्दै आएका थिए,’ असिस्टेन्ट चिफ कन्सटेबल मब्स हुसेनले भने ।
पुलिसले दर्जनौं पीडितलाई भिडियो हेरेर, सिनागाको म्यान्चेस्टर फ्ल्याटमा चोरिएका फोन, आइडी कार्ड र घडीलाई आधार मानेर सम्पर्क गरेको छ ।
