ए मेरो हजुर ४ को तयारीमा अनमोल र सुहाना, माघ १६ बाट छायांकन सुरु हुदैँ

२२ पुष २०७६, काठमाडौँ

गतबर्षको प्रदर्शनमा आएको चलचित्रमध्ये दर्शकको रोजाइमा पर्न सफल चलचित्र ए मेरो हजुर ३ पनि हो । बर्षको अन्त्यतिर रिलिज भएको ए मेरो हजुर ३ लाई दर्शकले औधी रुचाए । चलचित्रले निकै राम्रो कमाइ गर्न सफल भयो भने सुहानाको अभिनयको पनि चौतर्फी तारिफ भयो ।

ए मेरो हजुर ३ मा अनमोल केसी र सुहाना थापा मुख्य भूमिकामा थिए । यो जोडीलाई दर्शकले असाध्यै माया दिए । यस्तै एकपटक फेरि अनमोल र सुहानाले एकसाथ स्क्रिन सेयर गर्ने भएका छन् ।

अनमोल र सुहानाले ए मेरो हजुर ४ मा एकसाथ काम गर्न लागेका हुन् । अहिले चलचित्रको कथाको काम भैरहेको छ । यसमा अनमोल र सुहानाले पनि झरनालाई साथ दिइरहेका छन् । ए मेरो हजुर ४ को छायांकन माघ १६ बाट सुरु गरिने झरनाले बताएकी छिन् । चलचित्र ए मेरो हजुर ४ प्रेमकथामा आधारित हुनेछ ।