१२ माघ २०७६, काठमाडौं
अफगानी सेनाले पछिल्लो २४ घण्टामा गरेका स्थल तथा हवाइ आक्रमणमा परी ५१ जना तालिबान लडाकू मारिएका छन्।
अफगानिस्तानको रक्षा मन्त्रालयले आइतबार ९ वटा प्रान्तमा १३ वटा स्थल र १२ हवाइ आक्रमण गरिएको जनाएको छ। यी आक्रमणमा ५१ आतंककारी मारिएका छन्, १३ घाइते भएका छन्।
यस्तै ६ जनालाई पक्राउ गरिएको मन्त्रालयले जनाएको छ। तालिबानले पनि पछिल्लो दुई दिनमा आफ्नो आक्रमणमा परी थुप्रै अफगानी सैनिकको ज्यान गएको दाबी गरेको छ।
तालिबान र अमेरिकी वार्ताकारहरुबीच कतारको दोहामा चलेको वार्ता दुई दिनका लागि रोकिएको बेला अफगानी सेनाले हमला गरेको हो।
