एक म्यागजिनका म्यानेजरसँग अभद्र व्यवहार गरेका कारण जेल परेका थिए शाहरुख, मलमूत्र भएको जेलभित्र बिताएका थिए पुरा रात

१६ माघ २०७६, काठमाडौँ

बलिउडमा यस्ता केही सेलिब्रेटीहरु छन् जो आफूले गरेका गल्तीका कारण जेल पुगेका छन् । जेल जाने कलाकारको लिस्टमा सञ्जय दत्तदेखि सलमानसम्मको नाम रहेको छ । कलाकार जेल जानु अब त दर्शकको लागि पनि सामान्य बन्न थालिसकेको छ ।

यस्तै अभिनेता शाहरुख खानले पनि कुनै समयमा आफूपनि पक्राउ परेको बताए । उनले आफ्नो जीवनको रोचक घटनामध्येको एक जेल गएको पनि रहेको बताएका छन् ।

आफूले गरेको अभद्र व्यवहारका कारण शाहरुखले जेलको चिसो हावा खानु परेको थियो । शाहरुखले एक कार्यक्रममा गएको बेला आफू जेल परेको कुरा खुलाएका हुन् ।

उक्त कार्यक्रमका बेला शाहरुख खानलाई थुप्रै वर्षअघि एक म्यागजिनमा छापिएको लेखबारे सोधियो जसमा उनी जेल जानुपर्ने कारण लुकेको थियो । तब शाहरुख खानले यसबारे खुलासा गर्दै म्यागजिनमा छापिएको एक लेख पढेपछि आफूलाई अत्यधिक रिस उठेको र रिसमा उनले म्यागजिनका सम्पादकलाई फोन गरेर धम्कीसमेत दिएको बताए ।

उनले गाली गर्दा  सम्पादकले आफूलाई यसका लागि कूल रहन र ‘उक्त लेखलाई मजाकको रुपमा लिन’ आग्रह गरेको पनि उनले बताए ।

सम्पादकले त्यस्तो भनेपछि आफू सिधा म्यागजिनको कार्यालयमा गएर उनीमाथि रिस पोख्दै गाली गलौच गरेको पनि शाहरुखले जानकारी दिए ।

शाहरुखले गाली गरेकै कारण म्यागजिनका म्यानेजरले उनीमाथि उजुरी दिएका थिए । शाहरुख सेटमै भएको बेला प्रहरी आएका थिए । सुरुमा त शाहरुखले ती प्रहरी आफ्नो प्रशंसक भएको सम्झिरहेका थिए । उनी मख्ख पनि परेका थिए । तर पछि जेल जानु पर्दा उनको होस नै उड्यो ।

त्यसबेला उनी पहिलो पटक जेल गएका थिए । जेल निकै सानो रहेको पनि शाहरुखले बताए । त्यसमा नरमाइलो कुरा के छ भने जेल निकै नै फोहोर थियो, त्यहाँ मलमूत्र समेत रहेको र त्यस्तै ठाउँमा आफूले रात बिताएको शाहरुखले बताएका छन् ।