१६ माघ २०७६, काठमाडौं
चीनको उहान प्रान्तमा महामारीको रुपमा फैलिएको कोरोना भाईरस प्रभावितलाई ठमेलमा थियन वाङ सिङ फार्मेसी संचालन गरिरहेकी नेपाली व्यवसायी सरस्वती रिजालको नेतृत्वमा करिब ३ लाख थान मास्क पठाउँने तयारी भईरहेको छ ।
कविराज सरस्वती रिजालसँगको भिडियो कुराकानी :
आयुर्वेदमा कविराज गरेकी सरस्वती रिजालले परिवर्तन खबरसँग कुरा गर्दै भनिन् ,‘नेपालमा भूकम्पको भयावह अवस्थामा मित्रराष्ट्र चीनबाट उल्लेख्य सहयोग प्राप्त भएको थियो । चीनमा महामारीको रुपमा फैलिएको कोरोना भाईरस नियन्त्रणमा नेपाली भावना जोडियोस् र केहि हदसम्म सहयोग समेत होस् भन्ने उद्देश्यले आवश्यक प्रक्रिया पुर्याई केहि दिन भित्रै आफ्नो फार्मेसीले ३ लाख थान मास्क पठाउन लागेको हो ।’
महामारीको रुपमा फैलिएको कोरोना भाईरसको निदानको लागि हालसम्म कुनै औषधी पत्ता लाग्न लागेको छैन । यस्तो अवस्थामा मास्क प्रयोग नै प्रभावकारी हुने भएकोले नेपालबाट मास्क पठाउन लागेको रिजालले बताईन् । एकैपटकमा धेरै मास्कको माग भएकोले चिनियाँ उत्पादनले धान्न गाह्रो परेको समयमा नेपाली विद्यार्थी एशोसियशन मार्फत चिनियाँ सामाजिक संस्थाले प्रभावित र विशेष गरी उपचारमा संलग्न डाक्टर र नर्सलाई वितरण गरिने समेत उनले बताईन् ।
रिजालले थपिन्, ‘हामी नेपालीहरु मिलेर थप सहयोग गर्न सके, दुई देशका नागरिकको भावना बलियो हुने थियो । म अरु नेपाली व्यवसायीहरुलाई समेत चिनियाँ संकटको बेला सकेको सहयोग गर्न आग्रह गर्दछु ।’
चिनियाँ राष्ट्रपति सी जिन फिङको नेतृत्वमा चिनियाँ सरकारले कोरोना भाईरस प्रभावित उहान क्षेत्रमा भर्खरै स्थापना गरेको हस्पिटल र अन्य उपलब्ध उपाय अवलम्बन गरी चिनियाँ नागरिकहरुलाई उपयुक्त उपचार हुने विश्वास व्यक्त गर्दै मित्रराष्ट्र चीन छिट्टै कोरोना भाईरस नियन्त्रणमा सफल हुने र चिनियाँ जनजीवन छिट्टै सहज हुने धारणा राखिन् ।’
चीनमा हालसम्म कोरोना भाईसरका कारण करिब ६ हजार संक्रमित छन् भने १३२ को मृत्यु भईसकेको चिनियाँ समाचार माध्यमले जनाएको छ ।
