चलचित्र खेल्नेबारे प्रकाश भन्छन्, ‘चलिरहेको दोकान बन्द गरेर नयाँ दोकान सुरु गरेको छु’

१० फागुन २०७६, काठमाडौँ

प्रकाश सपूत चर्चित लोकगायक हुन् । उनले दोहोरी ब्याटल, बोल माया, गलबन्दी जस्ता हिट गीतहरु गाइसकेका छन् ।

अब उनी गायकबाट नायक पनि बन्ने भएका छन् । प्रकाशले नारायण रायमाझीको चलचित्र परदेशी २ बाट नेपाली चलचित्रमा डेब्यु गर्न लागेका हुन् ।

चलचित्रमा उनको अपोजिटमा नायिका बर्षा सिवाकोटी देखिने भएकी छिन् । प्रकाश चलचित्रलाई लिएर निकै उत्साहित र नर्भस पनि छन् ।

प्रकाशलाई परदेशी २ भन्दा पहिले पनि चलचित्रबाट अफर भने नआएका होइनन् । तर उनी राम्रो कथाको खोजीमा थिए । परदेशी २ को कथा एकदमै मन परेका कारण नै उनी चलचित्रमा काम गर्न राजी भएका हुन् ।

प्रकाशले चलिरहेको दोकान बन्द गरेर नयाँ दोकान खोलेको जस्तो महशुस भएको पनि बताएका छन् । तर उनले चलचित्रमा आफ्नो सतप्रतिशत दिने पनि बताएका छन् ।