२५ फागुन २०७६, काठमाडौँ
कोरोना भाइरस को त्रास बढ्दै गएपछि चलचित्र निर्माता संघ ले हाल छायांकन भैरहेका चलचित्रको छायांकन केहीसमयसम्म रोक्नको लागि अनुरोध गरेको थियो । तर निर्माता संघले पत्र पठाउँदा पनि केही चलचित्रको धमाधम छायांकन भैरहेको छ ।
यतिबेला पोखरामा चलचित्र ए मेरो हजुर ४ र परदेशी २ छायांकन भैरहेका छन् । ए मेरो हजुर ४ का निर्माता सुनिल कुमार थापाले ए मेरो हजुर ४ को छायांकन नरोक्ने जानकारी दिइसकेका छन् । उनले कोरोनाको त्रास नेपालमा बढ्दै गएकाले आफूहरु सावधानी भने पक्कै पनि अपनाउने बताएका छन् ।
यस्तै परदेशी २ का निर्देशक नारायण रायमाझीले भने चलचित्रको छायांकन गर्ने वा नगर्ने भन्ने विषयमा हाल छलफल भैरहेको जानकारी दिएका छन् ।
यस्तै कोरोना भाइरस भिडभाडबाट फैलने सक्ने भएकाले फिल्म हलहरु सञ्चालन गर्ने वा नगर्ने भन्ने विषयमा पनि छलफल भैरहेको छ । फिल्म हल भनेको भिडभाड हुने ठाउँ हो । यस्तै तत्कालको लागि भने विशेष सावधानीका साथ हलहरु सञ्चालन भैरहेका छन् ।
कोरोनाबाट सावधानीका लागि क्युएफएक्स हलले सेनिटाइजर लोसन, पाउडर र स्प्रे प्रयोगमा ल्याएको छ । यी सामाग्रीहरु क्युएफएक्स चेनमा रहेका सम्पूर्ण हलहरुमा प्रयोग गरिएको छ ।
अन्य कतिपय हलहरुले पनि दर्शकका लागि सेनिटाइजर लोसन, पाउडर तथा स्प्रे प्रयोगमा ल्याएका छन् ।
