२६ फागुन २०७६, काठमाडौँ
नेपाली चलचित्र क्षेत्रमा आएको केहीसमयमै दर्शकको मनमस्तिष्कमा बस्न सफल अभिनेता हुन्, प्रदिप खड्का । उनले चलचित्र क्षेत्रमा पाइला चलचित्र स्केप मार्फत राखेका थिए । विडम्बना पहिलो चलचित्र नै उनको असफल भयो । तर उनले हार मानेनन् । स्केपपछि आफ्नै लगानीमा प्रदिपले चलचित्र निर्माण गरे । तर त्यो चलचित्र पनि सफल हुन सकेन ।
२ चलचित्रमा असफलता पाएपछि निराश हुदैँ उनले चलचित्र क्षेत्रमा आफूले केही गर्न नसक्ने अड्कल लगाइसकेका थिए । पढाइको लागि अष्ट्रेलिया पढ्न जान लागेका प्रदिपलाई अचानक प्रेमगीत मा नायकको लागि अडिसनको लागि बोलाइयो । उनले अडिसन दिए, चकलेटी अनुहारका प्रदिपको लुक्ससँगै अभिनयले पनि सुदर्शन थापालाई तान्यो । जसका कारण उनले प्रदिपलाई प्रेमगीत मा ब्रेक दियो । प्रेमगीत बाट यतिधेरै सफलता पाउँछु भनेर सायदै प्रदिपले सोचेका थिए ।
प्रेमगीत व्यवसायिक रुपमा असफल भयो । तर यो चलचित्रले नै प्रदिपको भाग्य चम्काइदियो । प्रेमगीत पछि प्रदिपले पछाडी फर्केर हेर्नुपरेको छैन । उनलाई चलचित्रमा लिन चाहने निर्मात निर्देशकको लिष्ट निकै लामो छ । उनले चलचित्रमा त अफर पाइरहेका नै छन् । तर त्यो भन्दा ठूलो कुरा उनले आफूलाई माया गर्ने धेरै फ्यान कमाएका छन् । आज प्रदिप भनेपछि मरिहत्ते गर्ने फ्यानको संख्या लाखौँमा रहेको छ ।
धेरैले त उनलाई आफ्नो आइडल पर्सन समेत मान्ने गरेका छन् । यत्तिको सफलता पाउन उनले मेहेनत पनि निकै नै गरेका छन् । आज उनै मेहेनती अभिनेता आफ्नो २९ औँ जन्मदिन मनाउँदैछन् ।
आज प्रदिपको जन्मदिन परेकाले सामाजिक सञ्जालमा उनलाई शुभकामना दिनेको ओइरो नै लागेको छ । हरेक बर्ष झैँ फ्यानले यसबर्ष पनि प्रदिपको जन्मदिन विशेष बनाइदिएका छन् । हाल चलचित्र प्रेमगीत ३ को काममा व्यस्त रहेका प्रदिप प्रेमगीत ३ पछि चलचित्र विवाहमा काम गर्ने बताइएको छ । जहाँ उनको जोडी नायिका साम्राज्ञी राज्यलक्ष्मीसँग बाधिने छ ।
२९ बर्षिया प्रदिप अविवाहित छन् । उनको कुनै केटीसँग अफेयरको हल्ला पनि त्यति आएको छैन । तर नायिका जसिता गुरुङसँग उनको केमेष्ट्रि दर्शकले औधी रुचाएका कारण दर्शकले यी दुई प्रेममा पो छन् निक भन्ने अड्कल भने पक्कै काटेका थिए । प्रदिपको कामप्रतिको डेडिकेसनको प्रशंसा उनीसँग काम गर्ने हर कोहीले गर्ने गरेका छन् । उनी सबैका प्रिय अभिनेता प्रदिपलाई हाम्रो तर्फबाट पनि जन्मदिनको धेरै धेरै शुभकामना ।
