०१ चैत्र २०७६, काठमाडौँ
नेपालकै पहिलो कमेडी रियालिटी शो कमेडी च्याम्पियन ले दर्शकको निकै राम्रो साथ पायो । सुरुवातदेखि नै दर्शकले कमेडी च्याम्पियन लाई निकै रुचाए । विभिन्न चरणहरु पार गर्दै कमेडी च्याम्पियन ले उत्कृष्ट ३ प्रतिस्पर्धी पाएको छ ।
आज कमेडी च्याम्पियन को ग्राण्ड फिनाले रहेको छ । आज कमेडी च्याम्पियन ले आफ्नो पहिलो विजेता पाउनेछन् । फिनालेमा सुमन कोइराला, हिमेश पन्त र खड्ग बहादुर पुन मगर पर्न सफल भएका छन् ।
यी तिनै प्रतिस्पर्धीको आफ्नो ठाउँमा राम्रो क्रेज रहेको छ । त्यसैले कमेडी च्याम्पियन को विजेता को बन्छ भनेर त्यसै भन्न सकिन्न । ग्रान्ड फिनालेमा प्रमुख अतिथि महजोडी र राजेश हमाल उपस्थित हुँदै छन्। आज अपरान्ह ४ देखि ७ बजेसम्म फिनाले चल्ने छ।
‘कमेडी च्याम्पियन’मा सन्तोष पन्त, मनोज गजुरेल, प्रदीप भट्टराई र ऋचा शर्मा निर्णायक छन्। रिमा विश्वकर्माले कार्यक्रम सञ्चालन गर्दै आएकी छिन्।
