केहीसमय पछि ट्रेलर रिलिजसँगै ‘प्रेमगीत ३’ को नयाँ प्रदर्शन मिति सार्वजनिक गरिने

०७ चैत्र २०७६, काठमाडौँ

कोरोना भाइरस को त्रास बढेसँगै सरकारले बैशाख १७ गतेसम्मका लागि सम्पूर्ण सिनेमा हलहरु बन्द गर्ने घोषणा गरेको छ । योसँगै प्रदर्शनको तयारीमा रहेका सम्पूर्ण चलचित्रले आफ्नो प्रदर्शन मिति पछाडी सारेका छन् ।

यो बर्षको सर्वाधिक प्रतिक्षित चलचित्र प्रेमगीत ३ नयाँ बर्षको अवसरमा चैत्र २८ बाट देशव्यापी रुपमा प्रदर्शनमा आउने भनिएको थियो । तर कोरोना भाइरस का कारण अब चलचित्र तोकिएको  मितिमा प्रदर्शनमा नआउने भएको छ ।

चलचित्रको ट्रेलर सार्वजनिक गर्ने तयारी निर्माण टिमको रहेको थियो । तर अब केही हप्तापछि माहोल हेरेर चलचित्रको ट्रेलरसँगै नयाँ प्रदर्शन मिति तय गरिने चलचित्रका निर्माता सन्तोष सेनले बताएका छन् ।

सन्तोष सेनको लगानी रहेको चलचित्रलाई छेतन गुरुङ र सन्तोष सेनले संयुक्त रुपमा निर्देशन गरेका हुन् । चलचित्रमा प्रदिप खड्का, कृष्टिना गुरुङ, शिव श्रेष्ठ, अनुभव रेग्मी योगिशा खत्री, लक्ष्मी वर्देवा, मनिष लिम्बु, सुनिल थापा, माओत्से गुरुङ लगायतका कलाकारको मुख्य भूमिका रहेको छ ।