१० चैत्र २०७६, काठमाडौँ
कोरोना भाइरस का कारण यतिबेला विश्व आतंकित बनेको छ । भैरहेका कामहरु धमाधम बन्द हुन थालेका छन् । त्यतिमात्र नभएर सरकारले सकेसम्म सबैलाई घरमै बस्न अनुरोध समेत गरिरहेको छ ।
कोरोनाको प्रत्यक्ष प्रभाव फिल्म क्षेत्रलाई पनि पर्न गएको छ । हाल धमाधम भैरहेका चलचित्रका छायांकन रोकिएका छन् । यस्तै चलचित्र २ नम्बरी को छायांकन पनि रोकिएको छ । सोमबारबाट फिल्मको छायांकन स्थगित भएको निर्देशक लामाले फेसबुकमार्फत् जानकारी दिएका छन् । स्थिति सामान्य भएपछि फिल्म पुनः फ्लोरमा जाने उनले बताए ।
अभिनेता पल शाह र अभिनेत्री वर्षा राउत भान्सामा भलाकुसारी गरिरहेको क्यामेरामा कैद एक दृश्य सामाजिक सञ्जाल फेसबुकमा साझेदार गर्दै निर्देशक लामाले लेखेका छन्, ‘अशान्त मन र मस्तिष्क लिएर काम गर्न गाह्रो हुने भएकाले ‘२ नम्बरी’ फिल्मको छायांकन हाललाई रोकेका छौं । स्थिति सामान्य हुने वित्तिकै छायांकन यथावत गर्नेछौं ।’
