०३ बैशाख २०७७, काठमाडौँ
पेप्सीकोलामा रहेको सनसिटी अर्पाटमेन्टमा बस्ने एकै परिवारका २ जनामा कोरोना संक्रमण पुष्टि भएको छ । जसका कारण सनसिटीमा बस्ने सबै मानिसहरु निकै डराएका छन् ।
सनसिटीमै नेपाली चलचित्र क्षेत्रकी नायिका बेनिशा हमाल पनि बस्छिन् । आफ्नो परिवारसँग बेनिशा सनसिटीको अर्पाटमेन्टमा बस्दै आएकी थिइन् । उनले आफ्नो कोरोना लागेका व्यक्तिहरुसँग कहिल्यै चिनजान भने नभएको बताएकी छिन् ।
तर उनलाई निकै डर लागेको छ । उनले अब आफू घरबाट बाहिर निस्कदै ननिस्कने बताएकी छिन् । उनले केही समयलाई पुग्ने खाद्यान्न ल्याइसकेकाले घरबाट बाहिर निस्कने खासै आवश्यक पनि नभएको बताएकी छिन् ।
तर, नजिकै बस्ने भएकाले डर त लाग्ने नै भयो । अपार्टमेन्टभित्रका सबैले सामान किन्ने पसलहरु लगभग एउटै भएकाले पनि जोखिम छ नै । बेनिशा भन्छिन्, ‘अपार्टमेन्टको नजिक थोरै मात्र पसलहरु छन् । त्यसैले त्यहाँ चाहीँ डर लागेको छ ।’
उनले सोही अपार्टमेन्टमा बस्नेलाई कोरोना संक्रमण छ भन्ने कुरा समाचार पढेर थाहा पाइन् । अहिले अपार्टमेन्टलाई पूर्णरुपमा ‘सिल’ गरिएको छ । त्यहाँ बसोबास गर्ने हरेकको कोरोना टेस्ट गर्ने तयारी छ ।
बेनिशाले बरु नुन पानी खाएर बस्ने तर बाहिर ननिस्कने समेत बताएकी छिन् ।
