०६ बैशाख २०७७, काठमाडौं
अष्ट्रेलियाका अर्बपति शेष घलेले संचालन गरेको मेलवर्न इन्ष्टिच्युट अफ टेक्नोलोजीले कोरोना भाइरसका कारण आर्थिक संकट भोगिरहेका आफ्ना विद्यार्थीलाई सहायता दिने १० लाख डलरको कोष स्थापना गरेको छ ।
कोरोना भाईरसका कारण दैनिक गुजारा चलाउन र पढ्नका लागि आर्थिक संकट भोगिरहेका आफ्नो विद्यार्थीका लागि सहयोग गर्न कोष स्थापना गरिएको इन्ष्टिच्युटले जनाएको छ ।
शुक्रबार एक विज्ञप्ति जारी गर्दै एमआइटीले भनेको छ, हाम्रा केही विद्यार्थीले जागिर गुमाएका छन्, घर फर्कन पनि सकेका छैनन् र उनीहरुलाई अष्ट्रेलियामा गुजारा चलाउन पनि धौ धौ परिरहेको छ । यस्तो अवस्थामा हाम्रा विद्यार्थीको सुरक्षा हाम्रो उच्च प्राथमिकतामा पर्दछ । र यो दुखको घडीमा हामी सकेको सहयोग गर्दछौ ।’
दश लाख डलर कोषबाट एक जना विद्यार्थीले एक पटकका लागि बढीमा ५ सय डलरसम्म सहायता रकम पाउनेछन् । यो रकम फिर्ता गर्न पर्नेछैन ।
सहायता रकम पाउनका लागि भने सन् २०२० मा पहिलो ट्राइमेष्टरमा भर्ना भएको हुनुपर्ने जनाइएको छ । यो कोषबाट एमआइटीका सिड्नी र मेलवर्न क्याम्पसमा पढ्ने योग्यता पुगेका विद्यार्थीले राहत पाउनेछन् ।
