१३ बैशाख २०७७, काठमाडौँ
लकडाउनका कारण यतिबेला सबैजना आफ्नो परिवारसँग समय बिताइरहेका छन् । नेपालमा कोरोना संक्रमित दिनानुदिन बढेसँगै लकडाउन खुल्ने वा नखुल्ने पक्का छैन ।
यसैबिच चर्चित हाँस्यकलाकारहरुले लकडाउनको समयको सदुपयोग गर्दै लकडाउनसम्बन्धी नै एउटा छोटो चलचित्र तयार पारेका छन् ।
शर्ट फिल्ममा मदन कृष्ण श्रेष्ठ, हरिवंश आचार्य, दीपकराज गिरि, दीपाश्री निरौला, किरण केसी, निर्मल शर्मा, संजय श्रेष्ठ र सन्दिप क्षेत्रीको अभिनय देख्न सकिन्छ । फिल्ममा सबै कलाकारले एकै परिवारको सदस्यको अभिनय गरेका छन् र भिडियो मार्फत लकडाउन पालना गरेर घर भित्रै बसिरहन संदेश दिईएको छ ।
त्यस्तै यस्तो बेलामा सामाजिक दुरी कायम राख्न तर भावनात्मक दुरी नराख्न भनिएको छ । भिडियो सामग्री निर्माण गर्दा कोहि पनि घर बाहिर ननिस्केको बताइएको छ ।
यो छोटो चलचित्रको कथा भने सन्दिप क्षेत्रीले लेखेका हुन् । सामाजिक सञ्जालमा यो भिडियोले निकै तारिफ पाइरहेको छ । किनकी भिडियोले मानिसमाझ सचेतना फैलाउने काम गरेको छ ।
