२९ वैशाख २०७७, काठमाडौं
नेपालले नेपाली भूमि लिपुलेक अतिक्रमण गरी भारतले बनाएको सकडबारे वार्ताको लागि कोभिड १९ (कोरोना भाइरस)को अन्त्यसम्म पर्खिन नसक्ने भनी प्रतिक्रिया दिएको छ ।
भारतले नेपाली भूमि अतिक्रमण गरेर लिपुलेकमा सडक बनाएपछि नेपालले आपत्ति जनाएको छ भने, त्यसलाई यथास्थितिमा राख्न मागसमेत गरेको छ ।
जवाफमा भारतले आफ्नै भूमिमा सडक बनाएको दावी गरेर त्यसबारे वार्ता कोरोना सकिएपछि गर्ने भनेको छ । तर नेपालले त्यसबेलासम्म पर्खिन नसक्ने परराष्ट्रमन्त्री प्रदीप ज्ञवालीले बताएका छन् ।
अन्तर्राष्ट्रिय सम्बन्ध समितिको सोमबार (आज) बसेको बैठकमा परराष्ट्रमन्त्री ज्ञवालीले भने, ‘अस्ती भारतीय विदेश मन्त्रालयका प्रवक्ताको वक्तव्य हेरें । कोरोनापछि वार्ता गर्न तयार छौं भन्नुभएको रहेछ । हामी त्यति पर्खिने पक्षमा छैनौं । छिटो वार्ता शुरु हुनुपर्छ ।’
यसअघि नेकपाका अन्तर्राष्ट्रिय विभाग प्रमुख तथा वरिष्ठ नेता माधवकुमार नेपालले कोरोनाको अन्त्यसम्म नपर्खि तत्काल भिडिओ वार्ता गर्न सुझाएका थिए ।
|फाइल तस्वीर|
