३० बैशाख २०७७, काठमाडौं
अमेरिकी एक विशेषज्ञले अमेरिकामा कोरोना भाइरसको संक्रमणबाट मृत्यु हुनेको वास्तविक संख्या दोब्बर भएको बताएका छन् । अहिलेसम्म अमेरिकामा ८१ हजार ७ सय २४ जनाको मृत्यु भएको र संक्रमितको संख्या अहिले १३ लाख ८४ हजार ६ सय ८१ पुगेको आधिकारीक तथ्याङ्कमा उल्लेख छ ।
युनिभर्सिटी अफ टेक्ससका प्रा.मार्क हेइवार्डले अमेरिकाको वास्तविक तथ्याङ्क फरक रहेको बताएका छन् । हेइवार्ड अमेरिकाको सेन्टर फर डिजिज कन्ट्रोल (सिडिसी)लाई मृत्युदरका बारेमा सल्लाह दिने व्यक्ति हुन् ।
द इन्डिपेन्डेन्टसँगको कुराकानीका क्रममा उनले अमेरिकामा कोरोना भाइरसको संक्रमणबाट १ लाख ६० हजार मानिस मरिसकेको दावी गरेका छन् । उनले अहिले सार्वजनिक भएको संख्या भन्दा दुई गुणा संख्यामा मृत्यु भएको दावी गरेका हुन् । मृत्युदरका विषयमा सल्लाह दिने व्यक्तिबाटै यस्तो प्रतिक्रिया आएपछि अमेरिकी नागरिक त्रसित भएका छन् ।
अमेरिका अहिलेसम्म संसारमै सबैभन्दा धेरै प्रभावित मुलुक हो । प्रा. मार्कले कोरोना भाइरसको संक्रमणबाट मृत्यु हुनेको ठोस तथ्याङ्क पत्ता लगाउन निक्कै कठिन भएको बताएका छन् । उनले कोरोना भाइरसको संक्रमण भएका व्यक्तिको उपचार र परीक्षणमा पनि प्रश्न उठाएका छन् ।
अहिलेसम्मको अध्ययनमा गम्भीर बिरामीको उपचार गर्न समस्या भएको छ । मुटु रोगी, स्ट्रोक्स र कयान्सर जस्ता रोगको संक्रमणमा परेका व्यक्तिहरुमा थप चिन्ताले सताएको मार्कको भनाइ छ । उनीहरुले थप उपचार पाउन पनि समस्या भएको उनको तर्क छ ।
अमेरिकी विशेषज्ञहरुले यसअघि पनि पटक पटक कोरोना भाइरसको संक्रमण र मृत्युदरका विषयमा विभिन्न प्रश्न उठाएका छन् । रिपोर्टिङको तरिका र टेस्टिङको कमीलाई अमेरिकी विशेषज्ञहरुले प्रश्न गरेका छन् ।
