०२ वैशाख २०७७, काठमाडौं
कोभिड १९ (कोरोना भाइरस)बाट संक्रमित पहिलो नेपाली युवाको रोग पहिचानका लागि लिइएको जीनको नमूना परीक्षणबाट गैरकानुनी रूपमा अनुवांशिक .(जेनेटिक) सिक्वेन्सिङ गरिएको खुलासा भएको छ ।
नेपाल स्वास्थ्य अनुसन्धान परिषद् (एनएचआरसी)को इथिकल रिभ्यू बोर्डबाट अनुमति नलिई विदेशमा सिक्वेन्सिङ गरिएको पाइएको हो । सिक्वेन्सिङ गरिएको अनुसन्धानात्मक रिपोर्ट अमेरिकन सोसाइटी फर माइक्रोबायोलोजीको जर्नलमा प्रकाशित गरिएको छ ।
चीनको वुहानमा अध्ययनरत नेपाली युवाको स्वाब विश्व स्वास्थ्य संगठनको हङकङस्थित प्रयोगशालामा सिक्वेन्सिङ गरिएको हो । ३२ वर्षीय ती नेपाली युवकलाई गत ९ माघमा कोरोना संक्रमणको पुष्टि भएको थियो ।
परिषद्को इथिकल रिभ्यु बोर्डका एक सदस्यकाअनुसार रोग पहिचानको लागि लिइएको नमूनालाई ती संक्रमित युवा र परिषद्बाट अनुमति नलिई अनुसन्धान गरिएको हो ।
विदेशी अनुसन्धानकर्ता र नेपाली चिकित्सकको संयुक्त कार्य गैरकानुनी देखिएपछि स्पष्टिकरणका लागि पत्र काटिएको छ । ६ जना नेपाली चिकित्सकको संलग्नता देखिएपछि उनीहरूलाई स्पष्टिकरण सोधिएको छ ।
राष्ट्रिय जनस्वास्थ्य प्रयोगशाला, स्वास्थ्य सेवा विभाग, इपिडिमियोलोजी तथा रोग नियन्त्रण महाशाखा, शुक्रराज ट्रपिकल तथा सरुवा रोग अस्पताल टेकुमा कार्यरत विशिष्ट श्रेणीका चिकित्सकहरू संलग्न रहेको पाइएकोछ ।
परिषद्को इथिकल रिभ्यु बोर्डका एक पदाधिकारीले भने, ‘हामीबाट अनुमति लिइएको छैन । कसरी, किन र कहाँ पठाइएको हो ? यसबारे केही जानकारी छैन ।’
|फाइल तस्वीर|
