०५ जेठ २०७७, काठमाडौँ
बलिउडकी चर्चित नायिका अनुष्का शर्माले निर्माण गरेको सिरियल पाताल लोक को एक एपिसोडमा नेपाली शब्दको प्रयोग गर्दै एक महिलालाई निकै तुच्छ गाली गरिएको थियो । नेपाली कलाकारले अहिले उक्त कुराको निकै विरोध गरिरहेका छन् ।
रेखा थापाले पनि उक्त कुराबारे सामाजिक सञ्जालमा स्टाटस लेखकी छिन् । उनले नेपाली महिलाको अस्तित्वमाथि बोल्ने अधिकार कसैको नभएको बताएकी छिन् । त्यसका साथै रेखाले अनुष्काले नेपालीसँग माफी माग्न आवश्यक रहेको समेत बताएकी छिन् ।
उनले यस्तो भाषा र हेपाह प्रवृत्तिले बलिउडका फिल्म, कला साहित्यको नारी प्रतिको असहिष्णुता र सोचको स्तर पनि देखाएको बताउदै निर्माण पक्षले तुरुन्तै माफि मागोस र रेकर्डबाट हटाइयोस भन्ने माग गरेकी छिन् ।
रेखाको स्टाटस जस्ताको तस्तै-
एकातिर जमिन अतिक्रमण गरेर हाम्रो सर्वभौमिकता माथि धावा बोल्ने, भएन भनेर बलिउडका फिल्म र सिरियलमा नेपालीको मान मर्दन हुने गरेर प्रस्तुत गर्ने दादागिरीको घोर भ्रत्सना गर्दछु । पातल लोक नामक सिरियलमा नेपाली महिलाको अस्मिता र हाम्रो सार्वभौम देशको स्वाभिमानी छोरी हरुलाई जुन निच शब्द प्रयोग गरिएको छ त्यो घोर आपत्ति जनक छ । त्यती मात्र होइन एस्तो भाषा र हेपाह प्रब्रितीले बलिउडका फिल्म, कला साहित्यको नारी प्रतिको असहिष्णुता र सोचको स्तर पनि देखाएको छ । एसको निर्माण सम्बद्द पक्षले तुरुन्तै माफि मागोस र रेकर्ड बाट हटाइयोस । कुन देशका छोरी बहादुर छन भन्ने ईतिहास साक्षी छ, हामीले कुनै सिरियल वा कठपुतली बनेर फिल्म खेल्ने सँग सिक्नु छैन । यता नेपालमा भारतीय सिनेमाको दलाली गर्ने, लाइन लागेर हेर्ने र घर-घर मा हिन्दी सिरियल हेर्ने भिड पनि होसमा आओस ।
