दबंग निर्देशक अभिनव कश्यपले भने, ‘सलमानको परिवार बिषालु सर्पको टाउको हो’

०३ असार २०७७, काठमाडौँ

चलचित्र दबंग का निर्देशक अभिनव कश्यपले सामाजिक सञ्जालमा स्टाटस लेख्दै सलमान खान र उनको परिवारलाई ठूलो आरोप लगाएका छन् । उनले सुरुमा त सुशान्तको सुसाइडको विस्तृत अनुसन्धान हुन आवश्यक रहेको बताएका छन् ।

उनले सरकारसँग यसबारे अनुसन्धान गर्न माग गरेका छन् । त्यसका साथै उनले १० बर्षदेखि आफ्नो दुश्मन को हो भन्ने चिनिसकेको बताएका छन् । उनले नाम नै तोकेर आफ्नो दुश्मन सलमान खान, सोहेल खान, सलिम खान र अरबाज खान भएको बताएका छन् ।

उनले सलमानको परिवार बिषालु सर्प भएको समेत बताएका छन् । उनले लेखे, यहाँ थुप्रै साना माछा पनि छन् तर सलमान खानको परिवार विषालु सर्पको टाउको हो । कसैलाई डर धम्की दिन उनीहरु अवैध धन, राजनीतिक शक्ति र अन्डरवर्ल्ड सम्बन्धको मिश्रणको प्रयोग निकै चतुर्याइँका साथ गर्छन् ।’

अन्तिममा उनले आफ्नो मेसेजलाई धेरैभन्दा धेरै मानिसहरुमाझ सेयर गर्न र यसलाई फरवर्ड गर्न अपिल पनि गरे ।