ऋण तिर्नबाट जोगिन अपहरणमा परेको नाटक गर्ने व्यक्ति पक्राउ

०७ साउन २०७७, काठमाडौं

हिजो बेलुकी मात्र ऋण तिर्नबाट जोगिने उद्देश्यले आफू अपहरणमा परेको नाटक गर्ने व्यक्तिलाई प्रहरीले पक्राउ गरेको छ । नेपाल प्रहरीको महानगरीय अपराध महाशाखाका अनुसार गत असार २४ गते काठमाडौं महानगरपालिका–४, चुनदेवी बस्ने ३० वर्षीय शक्तिराज रेग्मी बेपत्ता भएका थिए ।

बिहान ६ बजे घरबाट निस्किएका उनी सम्पर्कविहीन भएर अपहरणमा परेको नाटक गरेको प्रहरीको भनाइ छ । महाशाखामा भने उनी अपहरणमा परेको भनेर यही साउन २ गते जानकारी गराइएको थियो । अपहरणमा परेको सूचनापछि खोजी गर्दा उनी काठमाडौंको नयाँ बसपार्कस्थित सुगन्ध होटलमा युवतीका साथ बसेको अवस्थामा फेला पारिएको महाशाखाले जनाएको छ ।

जग्गा व्यवसाय गर्छु भनेर कयौंसँग उनले करोडौँ रुपैया लिएको र पैसा तिर्नु नपरोस् भनेर आफू अपहरणमा परेको नाटक गरेको प्रारम्भिक बयान रेग्मीले दिएको प्रहरीको भनाइ छ । अपहरणमा नपरीकनै प्रहरीलाई झुटो सूचनामार्फत हैरानी दिइ राज्यका स्रोत–साधनको दूरुपयोग गराएकाले आवश्यक कारवाहीका लागि उनलाई सम्बन्धित कार्यालयमा पठाइएको महाशाखाका प्रवक्ता एवं प्रहरी उपरीक्षक ईश्वर कार्कीले जनाए ।