इनफ इज इनफ अभियानका ५ जना अभियन्ता पक्राउ

१४ साउन २०७७, काठमाडौं । विभिन्न माग राख्दै अनसनसहितको दबाबमुलक कार्यक्रम गर्दै आएको इनफ इज इनफ अभियानका ५ अभियन्तालाई प्रहरीले पक्राउ गरेको छ ।

आफूहरुको मागबारे सरकारलाई दबाब दिन भन्दै बिना पास सिंहदरबारभित्र छिर्न लागेका उनीहरुलाई दक्षिण गेटबाट प्रहरीले पक्राउ गरेको हो ।

उनीहरु जबरजस्ती सिंहदरबारभित्र पस्न खोजेपछि नियन्त्रणमा लिइएको प्रहरीको भनाइ छ । उनीहरु पाँचै जनालाई अहिले महानगरीय प्रहरी बृत्त सिंहदरबारमा राखिएको छ ।

पीसीआर परीक्षणको दायरा बढाइनु पर्ने, आरडीटी परीक्षण बन्द गरिनुपर्ने, भ्रष्टाचारीलाई कारबाही गरिनुपर्ने लगायतका विभिन्न माग राख्दै इनफ इज इनफ अभियानले दबाबमुलक कार्यक्रम गर्दै आएको छ ।