नयाँ कथाका साथमा आउँदो बिहिबारदेखि प्रशारणमा आउँदै ‘सोल्टिनी–३’

कलेज नेपालबाट प्रशारणमा आउने गरेको ‘सोल्टिनी’ नामक युट्युब सिरिजलाई दर्शकले निकै नै रुचाएका छन् । ‘सोल्टिनी’ मा मुख्य भूमिकामा अहिलेकी चर्चित मोडल रियाशा दाहाल थिइन् । ‘सोल्टिनी’ लाई रियाशाले नै निर्देशन गर्ने गरेकी थिइन् ।

तर केही हप्तादेखि ‘सोल्टिनी’ को प्रशारण बन्द भएको छ । अब दर्शकले ‘सोल्टिनी’ को नयाँ एपिसोडहरु हेर्न पाउने भएका छन् । नयाँ कथा, नयाँ कलाकारको साथमा आउने बिहिबारदेखि ‘कलेज नेपाल’ युटयुब च्यानलमा दर्शकले ‘सोल्टिनी–३’ हेर्न पाउनेछन् ।

‘सोल्टिनी’ को नयाँ अध्यायलाई शिवहरि नेपालले निर्देशन गरिरहेका छन् । शिवहरि यसअघि चर्चित टेलिसिरियल ‘गोलमाल’ मा ‘ठेकेदार’ नामक भूमिकामा देखिएका थिए । ‘गोलमाल’ मा कलाकारको रुपमा काम गरेका शिवहरि ‘सोल्टिनी’ मा भने निर्देशकको रुपमा काम गरिरहेका छन् ।

‘सोल्टिनी’ पूर्ण मनोरञ्जनात्मक युट्युब सिरिज भएको शिवहरि ‘परिवर्तन खबर’ लाई बताएका छन् । उनले भने, ‘सोल्टिनी–३ लाई राम्रो बनाउन आफूले सकेजति मेहेनत गरेको छु । त्यसैले पनि सोल्टिनी लाई दर्शकले जति माया दिनुभएको थियो, सोल्टिनी–३ लाई पनि दर्शकले उत्तिकै माया दिनुहुन्छ भन्ने अपेक्षा राखेको छु’ ।

‘सोल्टिनी–३’ मा कमेडी च्याम्पियन विजेता खड्ग बहादुर पुन, सामिया कार्की, बिष्णुहरी रिमाल, रोशन पोखरेल, आर्या बस्नेत, सिमा पौडेल लगायतका कलाकारको मुख्य भूमिका रहेको छ ।